بٹہ مالو میں شبانہ آگ کی واردات میں تین رہائشی مکان خاکستر

جموں وکشمیر کے گرمائی دارلخلافہ سری نگر کے گنجان آبادی والے علاقے بٹہ مالو میں آتشزدگی کی ایک بھیانک واردات میں تین رہائشی مکان خاکستر ہوئے ہیں۔

اطلاعات کے مطابق سری نگر کے بٹہ علاقے میں ہفتے کی شام کو رہائشی مکان سے آگ نمودار ہوئی جس نے آناً فاناً اپنے متصل چند مکانوں کو اپنی لپیٹ میں لے لیا۔

معلوم ہوا ہے کہ فائر اینڈ ایمرجنسی اور مقامی لوگوں کی بروقت کارروائی کے نتیجے میں آگ کو مزید پھیلنے سے روک دیا گیا۔

فائر اینڈ ایمرجنسی کے ایک عہدیدار نے یو این آئی کو بتایا کہ بٹہ مالو میں رہائشی مکان سے آگ نمودار ہونے کی اطلاع ملتے ہی ایک درجن کے قریب فائر ٹینڈروں کو روانہ کیا گیا۔

انہوں نے کہا کہ آخری اطلاعات موصول ہونے تک آگ کی اس واردات میں تین ر ہائشی مکان خاکستر ہوئے تھے۔

اس سلسلے میں مزید تفصیلات کا انتظار ہے۔