لولاب میں کنویں میں پھنسا ریچھ زندہ نہ رہا

کپوارہ کے لولا ب علاقے میں ایک کنویں میں گرا کالو بھالو باالآخر کنویں میں ہی دم توڑ بیٹھا کیوں کہ محکمہ وائلڈ لائف کا عملہ اس بھالو کو کنویں سے نکالنے میں ناکام ہوا جس پر حکام نے سخت برہمی کااظہار کرتے ہوئے متعلقہ عملے کے خلاف سخت کارروائی کا عندیہ دیا ہے ۔اطلاعات کے مطابق شمالی کشمیر کے ضلع کپوارہ میں لولاب کمار محلہ وانی دورسو نامی علاقے میں گزشتہ روز ایک کنویں میں کالے ریچھ کو پایا گیا تھا ۔ریچھ کے کنویں میں موجود ہونے کے ساتھ ہی محکمہ وائلڈ لائف کے متعلقہ عملہ کو مطلع کیا گیا تھا ۔ ذرائع نے بتایا کہ قریب 20فٹ گہرے کنویں میں کالے بھالو کو آٹھ گھنٹے بعد بھی وہاں سے محکمہ نے اسے نکالنے کی کوئی کوشش نہیں کی ۔ مقامی لوگوں کے مطابق جب انہوںنے ریچھ کو کنویں میں گرتا ہوا دیکھا تو لوگوں نے کنویں سے دوری اختیار کی تاکہ ریچھ کو نکلنے کا موقع فراہم ہو تاہم جب لوگ وہاں سے چلے گئے تو صبح دیکھا کہ ریچھ کنویں میں ہی دم توڑ بیٹھا تھا۔ ادھر ذرائع نے بتایا کہ محکمہ وائلڈ لائف کے متعلقہ عملہ کی غیر سنجیدگی کے نتیجے میں ایک کالا بھالو ہلاک ہوا ہے ۔ دریں اثناءجب اس سلسلے میں چیف وائلڈ لائف وارڈن سریش گپتا کے ساتھ بات کی گئی تو انہوںنے بتایا کہ اس معاملے میں پہلے ہی انکوائری کے احکامات صادر کئے جاچکے ہیںاور غفلت برتنے والے عملہ کے خلاف کارروائی ضرور ہوگی ۔