منشیات معاملے میں آرین کی ضمانت کی درخواست مسترد

ممبئی (یو این آئی) نارکوٹک ڈرگس اور سائیکو ٹروپک سبسٹینسز (این ڈی پی ایس) کی خصوصی عدالت نے منشیات معاملے میں بالی وڈ اداکار شاہ رخ خان کے بیٹے آرین خان اور ان کے دو دوستوں کی عدالتی تحویل میں توسیع کرتے ہوئے ان کے ضمانت کی درخواست مسترد کردی۔ آرین اور ارباز مرچنٹ ممبئی کی آرتھر روڈ جیل میں بند ہیں جبکہ من من دھمیچا خواتین کی بائیکلا جیل میں بند ہیں۔ این ڈی پی ایس کے خصوصی جج وی وی پاٹل نے تینوں ملزموں کی درخواست ضمانت مسترد کر دی۔ جسٹس پاٹل نے اس سے قبل 14 اکتوبر کو سیشن کورٹ میں ضمانت کی درخواست پر دلائل کے بعد اپنا حکم محفوظ رکھا تھا۔ استغاثہ نے اس بات کا اعادہ کیا کہ آرین گزشتہ کچھ برسوں سے منشیات کا باقاعدہ استعمال کرتے رہے ہیں اور اس کی تصدیق کیلئے کافی ثبوت موجود ہیں۔سماعت کے دوران دفاع نے اپنے دلائل میں کہا تھا کہ آرین کروز پر نہیں تھے اور اس وقت پکڑے گئے جب وہ ایک خصوصی مدعو کے طور پر پارٹی میں شرکت کیلئے جا رہے تھے ۔ انہوں نے بتایا کہ آرین نے کسی بھی قسم کی منشیات کا استعمال نہیں کیا تھا۔