دستکاری شعبے کو پروان چڑھانے کیلئے برآمدات (ایکسپورٹ) پر فوکس

’ایک ضلع ایک مصنوع‘ کے تحت متعلقین کے ساتھ ایس بی آئی کا تبادلہ خیال
سری نگر//17مئی / جموں وکشمیر کے دستکاری شعبے کو پروان چڑھانے اور اسکی برآمدات (ایکسپورٹ) کو بڑھانے کیلئے متعلقہ برآمدکنندگان اور دستکاروں کے ساتھ بنکوں نے ہاتھ ملانا شروع کیا ہے ۔اس حوالے سے حال ہی میں ملک کے سب سے بڑے بنک سٹیٹ بینک آف انڈیا نے محکمہ دستکاری اور ہینڈ لومز، جموں و کشمیر کے اشتراک سے سری نگر اور اننت ناگ ضلع کے برآمد کنندگان کے لیے سری نگر میں ”ایک ضلع ایک مصنوعات‘ (ODOP) کی مرکزی سرکاری اسکیم کے تحت ایکسپورٹرز کنیکٹ پروگرام کا انعقاد کیا۔قابل ذکر بات یہ ہے کہ مرکزی حکومت نے بین الاقوامی سطح پر دستکاری کے فروغ کے لیے سری نگر اور اننت ناگ ضلع کی نشاندہی کی ہے۔ وادی کشمیر میں دستکاری سے وابستہ تقریباً 150 برآمد کنندگان نے اس پروگرام میں شرکت کی۔ SBI سرینگر کی ٹیم نے برآمد کنندگان کو ہینڈلوم کے فروغ کے لیے محکمہ ہینڈلوم کی جانب سے دی گئی مختلف اسکیموں اور فوائد کے بارے میں ایک پریزنٹیشن دی۔ برآمد کنندگان کے لیے قرض کی مختلف سہولیات اور فوائد جیسے گولڈ کارڈ سکیم وغیرہ، درآمدات اور برآمدات کی مختلف سہولیات پر تبادلہ خیال کیا گیا۔برآمد کنندگان نے برآمد کنندگان کی ضروریات کو پورا کرنے اور بین الاقوامی سطح پر مقامی دستکاری کو فروغ دینے کے لیے اس طرح کے پروگرام کے انعقاد کے لیے SBI کے اقدام کی تعریف کی۔اس حوالے سے دستکاری شعبے سے جڑے طبقوں نے خبررساں ایجنسی کو بتایا کہ یہ ایک اچھا اقدام ہے ۔کشمیری دستکاری شعبے کو ایکسپورٹ کے زیادہ سے زیادہ مواقع ملنے چاہیں جس سے یہ قدیم ورثہ محفوظ رہے اور اس سے وابستہ طبقے مالیاتی طور مستحکم بنیں ۔