روس نواز باغیوں کا حملہ، پہلی بار یوکرین کے 2 فوجی ہلاک

بھاری اسلحے کا استعمال ،30 سے زیادہ مقامات کو نشانہ بنانے کی کوشش
کیو:ماسکو/ ایجنسیز/یوکرین کی فوج نے تصدیق کی ہے کہ روس کے حمایت یافتہ باغیوں کے حملے میں ملک کے مشرق میں دو فوجی ہلاک اور چار زخمی ہو ئے ہیں جس کے بعد یہ خدشات مزید بڑھ گئے کہ روس کبھی بھی فوجی کارروائی کا آغاز کر سکتا ہے۔ یوکرین کی فوج نے ایک بیان میں کہا ہے کہ اس نے ہفتے کو مختلف مقامات پر جنگ بندی کی 70 خلاف ورزیاں نوٹ کیں جب کہ گزشتہ 24 گھنٹوں میں 66 خلاف ورزیاں کی گئی تھیں۔ عرب نشریاتی ادارے ’الجزیرہ‘کے مطابق فوج کا مزید کہنا تھا کہ باغیوں نے بھاری اسلحے کا استعمال کرتے ہوئے فرنٹ لائن کے ساتھ ساتھ 30 سے زیادہ مقامات کو نشانہ بنانے کی کوشش کی جو کہ طویل عرصے سے کشیدگی کم کرنے کے لیے کیے گئے معاہدوں کی خلاف ورزی ہے۔ یوکرین کے حکام کا کہنا تھا کہ دو ماہ سے زائد عرصے سے جاری کشیدگی میں فوجیوں کی یہ پہلی اموات ہیں۔ مبصرین کے مطابق مشرقی یوکرین میں 1500 سے زائد جنگ بندی کی خلاف ورزیاں کی گئیں جو کہ رواں سال میں سب سے زیادہ ہیں۔