اوٹاوا، 10 ستمبر (یو این آئی) کینیڈا کی وزارت صحت نے ہفتہ کو فائزر کمپنی کی کووڈ ویکسین کو پانچ سال سے کم عمر کے بچوں کے لیے منظوری دے دی۔ وفاقی محکمہ صحت نے اپنی ویب سائٹ پر پانچ سال سے کم عمر بچوں کے لیے کووِڈ 19 کی ویکسین کی منظوری کے بارے میں اطلاع دیتے ہوئے کہا کہ دستیاب اعداد و شمار سے ظاہر ہوتا ہے کہ یہ ویکسین چھ ماہ سے چار سال تک کے بچوں میں اس مہلک وائرس کے انفیکشن کو روکنے کے لیے کارگر ثابت ہوگی۔ ویکسین کے فوائد اور خطرات کے بارے میں بتاتے ہوئے محکمہ نے کہا کہ مذکورہ عمر کے افراد کے لیے تین خوراکیں مفید سمجھی گئی ہیں، پہلی خوراک کے تین ہفتے بعد دوسری خوراک اور دوسری خوراک کے کم از کم آٹھ ہفتے بعد تیسری خوراک لینا ضروری ہے ۔ جولائی میں وزارت صحت کی طرف سے موڈرنا کی اسپائک ویکس ویکسین کی منظوری کے بعد یہ اس عمر کے گروپ کے لیے منظور شدہ دوسری ویکسین ہے ۔