اب مسئلہ جموں وکشمیرکا نہیں بلکہ پاکستان کے زیر قبضہ جموں وکشمیرکا ہے:لیفٹیننٹ گورنر منوج سنہا

 سری نگر میں اقوام متحدہ کے دفتر کی اب کوئی ضرورت نہیں
 منتخب حکومت کا ایجنڈابھی امن، ترقی، سرمایہ کاری اور نوکری ہوگا تو نہ ہمیں کوئی مسئلہ ہوگا اور نہ ہی حکومت کو
ملک مخالف سرگرمیوں میں ملوث ملازمین کی شناخت اور ڈوزیئر تیار کر کے بعدبرطرفی کاعمل جاری رہے گا
سری نگر/ جموں وکشمیرکے لیفٹیننٹ گورنر منوج سنہا نے کہا ہے کہ سری نگر میں اقوام متحدہ کے دفتر کی اب کوئی ضرورت نہیں ہے لیکن انہوں نے واضح کیا کہ یہ مسئلہ وزارت خارجہ کے دائرہ کار میں آتا ہے اور متعلقہ وزارت کوہی اس پر بات کرنا ہوگی۔ لیفٹنٹ گورنر نے کہاکہ وزیراعلیٰ عمر عبداللہ کی سربراہی والی حکومت کیساتھ تعلقات کو اچھا قرار دیتے ہوئے کہاکہ اگر منتخب حکومت کاایجنڈا بھی امن، ترقی، سرمایہ کاری اور نوکری ہوگا تو نہ ہمیں کوئی مسئلہ ہوگا اور نہ ہی حکومت کو۔ لیفٹیننٹ گورنر نے کہا کہ دہشت گردانہ اورملک مخالف سرگرمیوں میں ملوث ملازمین کی شناخت اور ان کےخلاف ڈوزیئر تیار کرنے کے بعدبرطرفی کاعمل جاری رہے گا۔جے کے این ایس مانٹرینگ ڈیسک کے مطابق لیفٹنٹ گورنر منوج سنہا نے قومی سطح کی ایک نیوز چینل کو انٹرویو دیتے ہوئے ایک سوال کے جواب میں کہا کہ ا قوام متحدہ کا دفتر سری نگر میں بند ہونا چاہئے کیونکہ صورتحال اب بہترہوئی ہے ۔انہوںنے کہاکہ اب مسئلہ جموں وکشمیرکا نہیں بلکہ پاکستان کے زیر قبضہ جموں وکشمیرکا ہے۔ منوج سنہا نے کہا کہ سری نگر میں اقوام متحدہ کے دفترکامسئلہ ان کے دائرہ اختیار میں نہیں ہے اور وزارت خارجہ اس کا جواب دینے کےلئے بہتر پوزیشن میں ہوگی۔ تاہم انہوںنے کہاکہ اب سری نگرمیںاس کی ضرورت نہیں ہے۔ لیفٹیننٹ گورنر منوج سنہا نے ایک اورسوال کے جواب میں کہا کہ ان کے حکومت ( وزیراعلیٰ عمر عبداللہ کی سربراہی والی حکومت)کے ساتھ اچھے تعلقات ہیں۔انہوںنے کہاکہ منتخب حکومت سے پہلے، ایجنڈا امن، ترقی، سرمایہ کاری اور نوکری تھا، اگر منتخب حکومت کا بھی ایسا ہی ایجنڈا ہے تو نہ ہمیں کوئی مسئلہ ہوگا اور نہ ہی حکومت کو۔ عمر عبداللہ حکومت کی درجہ بندی کرنے سے متعلق پوچھے جانے پر منوج سنہا نے کہا کہ رائے بنانے کے لئے چار ماہ کا وقت بہت کم ہے لیکن ان کا حکومت کےساتھ اچھا رابطہ ہے۔لیفٹنٹ گورنر نے کہاکہ جموں و کشمیر تنظیم نو قانون کے مطابق دونوں (لیفٹیننٹ گورنر اور منتخب حکومت) کے اختیارات واضح طور پر بیان کیے گئے ہیں۔انہوں نے کہاکہ ان (حکومت) کے پاس اپنے اختیارات ہیں۔ ہمارے پاس اپنے اختیارات اور حقوق ہیں۔ ہم مل کر جموں و کشمیر کو ترقی کی طرف لے جا سکتے ہیں۔لیفٹیننٹ گورنر منوج سنہانے کہاکہ پچھلے5 چھ سالوں میں جموں و کشمیر کی معیشت میں بہتری آئی ہے۔ معیشت 2017 سے دوگنی ہو گئی ہے۔انہوںنے کہاکہ فی کس آمدنی میں بھی اضافہ ہوا ہے۔ جموں و کشمیر بینک 1200 کروڑ روپے کے خسارے میں تھا اور اب بینک نے1700 کروڑ روپے کامنافع دکھایاہے۔لیفٹنٹ گورنر نے کہاکہ گزشتہ پانچ سالوںمیں اچھا موڑ آیاہے۔انہوں نے کہا کہ کشمیر کے لئے ٹرین جس کا وزیر اعظم نریندر مودی افتتاح کرنے جا رہے ہیں، جموں و کشمیر میں ترقی کو مزید فروغ دے گی اور رابطے کو بہتر بنائے گی۔کشمیری پنڈتوں کی وادی کشمیر میں واپسی سے متعلق ایک سوال کے جواب میں لیفٹنٹ گورنر منوج سنہا نے کہا کہ کشمیری تارکین وطن کے زیادہ تر مسائل پر توجہ دی گئی ہے اور جب وادی میں امن ہوگا تو وہ اپنے گھروں کو لوٹ جائیں گے۔انہوں نے مزید کہاکہ امید ہے، ہم جلد ہی وہ دن دیکھیں گے جب کشمیری پنڈت وادی میں اپنے گھروں میں رہیں گے۔بعض سیاست دانوں کے اس تصور کو مسترد کرتے ہوئے کہ کشمیر میں امن کو زبردستی کر دیا گیا ہے، لیفٹیننٹ گورنر نے کہا کہ اگر امن کو مجبور کیا جاتا تو بالی ووڈ اور ہالی ووڈ کی فلموں کی شوٹنگ نہ ہوتی۔انہوں نے کہا کہ محرم کا جلوس نہ نکلتا، سینما ہال نہ چل رہے ہوتے، سیاح بڑی تعداد میں نہ آتے اور اگر مستقل امن نہ ہوتا تو صنعتی سرمایہ کاری نہ ہوتی۔منوج سنہا نے کہا کہ جموں و کشمیر میں مستقل امن قائم کرنے کی یہ حکومت ہند کی پالیسی ہے اور پچھلے5سالوں کے دوران اس میں کافی حد تک کامیابی ملی ہے۔انہوں نے ساتھ ہی کہاکہ پتھراو ¿ ایک تاریخ بن چکا ہے۔ کاروبار معمول کے مطابق چل رہا ہے، تعلیمی ادارے معمول کے مطابق کام کر رہے ہیں، نوجوانوں کی ملک جیسی امنگیں ہیں۔تاہم،لیفٹنٹ گورنر نے کہا، جب جموں و کشمیر میں امن ہوتا ہے تو پڑوسی (پاکستان کی طرف اشارہ) کو تکلیف ہوتی ہے۔انہوںنے کہاکہ جموں و کشمیر میں پ ±رامن لوک سبھا اور اسمبلی انتخابات جنہیں ملک بھر میں سراہا گیا اور عالمی سطح پر پڑوسی کے ساتھ اچھا نہیں رہا۔لیفٹنٹ گورنر نے مزید کہا کہ دہشت گردوں کا کوئی بھی اعلیٰ کمانڈر زندہ نہیں بچا ہے اور مقامی دہشت گردوں کی اب تک کی سب سے کم بھرتی ہوئی ہے۔منوج سنہا نے کہا کہ لوگوں کو دریائے جہلم کے کنارے رات گئے تک پیدل چلتے ہوئے دیکھا جا سکتا ہے۔ انہوںنے کہاکہ اگر لوگ محسوس کریں کہ حالات معمول پر آ گئے ہیں تو یہ اچھی بات ہے۔ سیاست دانوں کے لیے بیانات دینے کی سیاسی مجبوریاں ہو سکتی ہیں۔ لوگ اب چاہتے ہیں کہ امن قائم رہے۔ یہ سب وزیر اعظم، وزیر داخلہ اور پوری حکومت کے اپروچ کی وجہ سے ممکن ہوا ہے۔پی ڈی پی صدر محبوبہ مفتی کی طرف سے سرکاری ملازمین کی برطرفی کی مخالفت پر لیفٹیننٹ گورنر نے کہا کہ یہ عمل ملازمین کی شناخت اور ان کےخلاف ڈوزیئر تیار کرنے کے بعد جاری رہے گا۔انہوں نے کہا کہ حکومت نے انتہائی شفاف طریقے سے اور میرٹ کی بنیاد پر40 ہزار نوکریاں دی ہیں۔