زرمبادلہ کے ذخائرمیں ایک بار پھر کمی

2.7 ارب ڈالر کمی کے ساتھ 597.73 ارب ڈالر رہ گئے
ممبئی :۹مئی (یو این آئی) ملک کے غیرملکی زرمبادلہ کے ذخائر 29 اپریل کو اختتام پزیر ہفتے میں مسلسل ساتویں ہفتے گراوٹ کے ساتھ 2.7 ارب ڈالر کم ہوکر 597.73 ارب ڈالر رہ گئے ۔اس سے قبل 22 اپریل کواختتام پزیر ہفتے میں غیر ملکی زرمبادلہ کے ذخائر مسلسل چھٹے ہفتے 3.27 ارب ڈالر کم ہو کر 600.4 ارب ڈالر رہ گئے ۔ اسی طرح 15 اپریل کو اختتام پزیر ہفتے میں 311 ارب ڈالر کی کمی سے 603.7 ارب ڈالر، 08 اپریل کو اختتام پزیر ہفتے میں 2.47 ارب ڈالر کم ہو کر 604 ارب ڈالر، یکم اپریل کواختتام پزیرہفتے میں 11.17 ارب ڈالرکم ہو کر 606.48 ارب ڈالر اور 25 مارچ کو اختتام پزیر ہفتے میں 2.03 ارب ڈالرکم ہو کر 617.65 ارب ڈالر رہ گئے ۔ ریزروبینک کے جاری کردہ ہفتہ وار اعداد و شمار کے مطابق29 اپریل کواختتام پزیر ہونے ہفتے میں غیر ملکی زرمبادلہ کے ذخائر کے سب سے بڑے جزوغیر ملکی کرنسی کے اثاثے 1.1 ارب ڈالر گر کر 532.8 ارب ڈالر رہ گئے ۔ اسی طرح سونے کے ذخائر 12 ارب ڈالر کم ہوکر 41.6 ارب ڈالر رہ گئے ۔