اسٹاک مارکیٹ میں اضافہ پر بریک

سینسیکس 224 پوائنٹس اور نفٹی 66 پوائنٹس گراوٹ
ممبئی، 14 ستمبر (یو این آئی) عالمی سطح سے منفی اشارے ملنے سے گھریلو سطح پر آئی ٹی، ٹیک، تیل اور گیس جیسے بڑے گروپوں میں فروخت نے آج چار دن تک جاری رہنے والے منافع کو بریک لگا دی اور سینسیکس اور نفٹی گراوٹ کے ساتھ بند ہوئے ۔ بی ایس ای کا 30 شیئروں والا حساس انڈیکس سینسیکس 224.11 پوائنٹس گر کر 60346.97 پر اور نیشنل اسٹاک ایکسچینج (این ایس ای) کا نفٹی 66.30 پوائنٹس گر کر 18003.75 پر آگیا۔ گراوٹ کا اثر چھوٹی اور درمیانی کمپنیوں پر بھی نظر آیا، جہاں بی ایس ای مڈ کیپ 0.10 فیصد گر کر 26225.31 پوائنٹس اور اسمال کیپ 0.01 فیصد گر کر 29892.37 پوائنٹس پر آ گیا۔ بی ایس ای پر کل 3611 کمپنیوں کا کاروبار ہوا جن میں سے 1789 میں کمی جبکہ 1685 بڑھنے میں کامیاب رہیں۔ اس دوران 137 کمپنیوں میں کوئی تبدیلی نہیں ہوئی۔ بی ایس ای میں شامل گروپوں سے گراوٹ میں رہنے والوں میں آئی ٹی 3.28 فیصد، ٹیک 2.85 فیصد، آئل اینڈ گیس 0.90 فیصد اور سی ڈی 0.83 فیصد شامل ہیں۔ فائدے میں رہنے والوں میں دھاتیں 1.91 فیصد، بینکنگ 1.28 فیصد، فنانس 0.93 فیصد، بنیادی مواد 1.18 فیصد شامل ہیں۔