ملک کی تقسیم ہندوستانی تاریخ کا غیر انسانی باب: امت شاہ

تقسیم کے دوران اپنی جانیں گنوانے والے تمام افراد کو خراج عقیدت
نئی دہلی، 14 اگست (یو این آئی) امور داخلہ اور امدادِ باہمی کے مرکزی وزیر امت شاہ نے تقسیم کی ہولناکی کے یادگاری دن کے موقع پر ان لاکھوں لوگوں کوخراج تحسین پیش کیا ہے ،جنہوں نے 1947 میں تقسیم کاخمیازہ برداشت کرنا پڑا۔ اپنے ٹویٹ میں، جناب امت شاہ نے کہا ہے کہ 1947 میں ملک کی تقسیم ہندوستانی تاریخ کا وہ غیر انسانی باب جسے کبھی فراموش نہیں کیا جاسکتا۔ تقسیم کے دوران تشدد اور نفرت نے لاکھوں جانیں لیں اور لاتعداد لوگوں کو بے گھر کر دیا۔ آج تقسیم کی ہولناکی کے یادگاری دن کے موقع پر، میں ان لاکھوں لوگوں کو خراج تحسین پیش کرتا ہوں جنہوں نے تقسیم کا خمیازہ برداشت کیا۔ مرکزی وزیر داخلہ نے کہا، “تقسیم کی ہولناکی کا یادگاری دن ملک کی نوجوان نسل کو تقسیم کے دوران اذیتوں اور مصائب برداشت کرنے کی یاد دلاتا رہے اور ملک میں امن اور ہم آہنگی برقرار رکھنے کے لیے ہم وطنوں کو ہمیشہ تحریک دیتا رہے گا۔”دریں اثناءوزیراعظم نریندر مودی نے تقسیم کی ہولناک یادگاری دن کے موقع پر ان تما م لوگوں کو خراج عقیدت پیش کیا، جنھوں نے تقسیم کے دوران اپنی جانیں گنوا دی تھیں۔ ایک ٹوئیٹ میں وزیراعظم نے کہا: “تقسیم کی ہولناک یاد کے دن پر، آج ان تمام لوگوں کو خراج عقیدت پیش کرتا ہوں، جنھوں نے تقسیم کے دوران اپنی جانیں گنوا دی تھیں اور تاریخ کے اس المناک دور میں مصائب برداشت کرنے والے ان لوگوں کے تحمل اور ان کی ہمت و حوصلے کی سراہنا کرتاہوں۔