یوم آزادی کی تقریبات ،دہلی میں سخت حفاظتی انتظامات

سرحدوں پرکمرشل اور ٹرانسپورٹ گاڑیوں کی نقل و حرکت پر پابندی، تمام اضلاع میں حفاظتی اقدامات
نئی دہلی، 14 اگست (یو این آئی) قومی دارالحکومت دہلی میں یوم آزادی کی تقریبات سے قبل سیکورٹی سخت کر دی گئی ہے ۔ پولیس نے کسی بھی ناخوشگوار واقعے کو روکنے کیلئے تمام اضلاع میں حفاظتی اقدامات کیے ہیں۔ سرحدوں پرکمرشل اور ٹرانسپورٹ گاڑیوں کی نقل و حرکت پر پابندی ہوگی۔ دہلی ٹریفک پولیس نے کہا کہ 14 اگست کو 22.00 بجے سے اگلے دن 11.00 بجے کمرشل اور ٹرانسپورٹ گاڑیوں کی آمد و رفت کے لیے 18 سرحدی داخلی راستے تک بند رہیں گے ۔پولیس کچھ ہاٹ سپاٹ اور حساس علاقوں میں پوری چوکسی کر رہی ہے ۔ اس نے حفاظتی انتظامات پر نظر رکھنے کے لیے اہم سڑکوں، گنجان بازاروں اور دیگر مقامات پر پیدل گشت بڑھا دیا ہے ۔دہلی پولیس نے ایک پریس کانفرنس میں کہا کہ یہاں فل پروف سیکورٹی کے لیے 10,000 سے زیادہ پولیس اہلکار تعینات کیے گئے ہیں۔دہلی پولیس کے اسپیشل کمشنر دیپندر پاٹھک نے کہا، "دہلی پولیس کی تمام اکائیوں کی طرف سے مرکزی ایجنسیوں کے ساتھ مل کر سیکورٹی کے انتظامات کیے جا رہے ہیں اور اس سال ٹیکنالوجی کو فورس کی طاقت کو بڑھانے کے طریقے کے طور پر استعمال کیا جا رہا ہے ۔”پولیس عوام سے اپیل کر رہی ہے کہ یوم آزادی کے موقع پر حفاظتی وجوہات کی بنا پر اڑنے والی اشیاءکا استعمال نہ کریں۔ گشت تیز کر دیا گیا ہے اور سماج دشمن عناصر پر نظر رکھنے کے لیے اسٹریٹجک پوائنٹس پر اضافی پِکیٹ تعینات گئے ہیں۔پولیس نے کہا کہ وزیر اعظم نریندر مودی یوم آزادی پر لال قلعہ کی فصیل سے قوم سے خطاب کریں گے ، جس کے بعد حفاظتی وجوہات کی بناءپر قلعہ کے اندر اور اس کے ارد گرد کچھ پابندیاں عائد کی جائیں گی۔دہلی میٹرو ریل کارپوریشن کے مطابق یوم آزادی کے سیکورٹی انتظامات کی وجہ سے میٹرو پارکنگ بند رہے گی۔ اتوار کی صبح 6 بجے سے 15 اگست تک دہلی میٹرو اسٹیشنوں پر پارکنگ کی کوئی سہولت نہیں ہوگی۔ تاہم میٹرو ٹرین کی خدمات معمول کے مطابق چلتی رہیں گی۔