نتیش کمار نے وزیر اعلیٰ کے عہدے سے استعفیٰ دے دیا

بہار میں بی جے پی سے رشتہ توڑ کر آر جے ڈی کے ساتھ نئی حکومت بنائیں گے
پٹنہ، ۹اگست (یو این آئی) بہار میں تیزی سے بدلتے ہوئے سیاسی واقعات کے درمیان جنتا دل یونائیٹڈ (جے ڈی یو) کے ایک بار پھر بھارتیہ جنتا پارٹی (بی جے پی) سے تعلقات توڑنے کے اعلان کے بعد مسٹر نتیش کمار نے وزیر اعلیٰ کے عہدے سے استعفیٰ دے دیا ہے ۔ اب راشٹریہ جنتا دل (آر جے ڈی) نے کانگریس اور بائیں بازو کی جماعتوں کے ساتھ مل کر نئی حکومت بنانے کی مشق شروع کردی ہے ۔ جے ڈی (یو) کے ارکان پارلیمنٹ، ایم ایل ایز اور پارٹی کے سینئر عہدیداروں کے ساتھ میٹنگ میں بی جے پی سے تعلقات توڑنے کا فیصلہ کئے جانے کے بعد، وزیراعلیٰ شام 4.00بجے کے قریب گورنر ہا[؟]س پہنچے اور گورنرپھاگو چوہان کو اپنا استعفیٰ پیش کیا۔ اس کے بعد مسٹر کمار سیدھے سابق وزیر اعلیٰ اور آر جے ڈی سربراہ لالو پرساد یادو کی بیوی رابڑی دیوی کی سرکاری رہائش گاہ پہنچے ۔ آر جے ڈی لیڈر اور مسٹر لالو پرساد یادو کے چھوٹے بیٹے تیجسوی پرساد یادو بھی وہاں موجود ہیں۔ کانگریس ایم ایل اے شکیل احمد خان نے کہا کہ مہاگٹھ بندھن کی نئی حکومت میں مسٹر نتیش کمار وزیر اعلیٰ ہوں گے ۔ سب کچھ طے پا گیا ہے اور اب جلد نئی حکومت بنے گی۔ قابل ذکر ہے کہ بہار میں مسٹر نتیش کمار کی قیادت والی نئی حکومت کو آر جے ڈی، کانگریس، بائیں بازو اور ہندوستانی عوام مورچہ (ایچ۔ اے ۔ ایم) کی حمایت حاصل ہے ۔ فی الحال جے ڈی (یو) کے پاس 45، آر جے ڈی کے 79، کانگریس کے 19، بائیں بازو کے 16 اور ایک دیگر ہے ، جس سے اس حکومت کو کل 164 اراکین اسمبلی کی حمایت حاصل ہے ۔