ہنگامہ آرائی کے باعث کارروائی ایک بار پھر ملتوی
نئی دہلی، ۴اگست (یو این آئی) لوک سبھا کی کارروائی جو گزشتہ تین دنوں سے اچھی طرح سے چل رہی تھی، جمعرات کو ایک بار پھر متاثر ہوئی جب کانگریس کے ارکان نے حکومت اور انفورسمنٹ ڈائریکٹوریٹ جیسے اداروں کے غلط استعمال کا الزام لگاتے ہوئے زبردست ہنگامہ کیا۔ جس کی وجہ سے ایوان کی کارروائی دوپہر 2 بجے تک ملتوی کر دی گئی۔جیسے ہی لوک سبھا اسپیکر اوم برلا نے 11 بجے ایوان کی کارروائی شروع کی، کانگریس کے ارکان نے حکومت پر من مانی، آمریت اور سرکاری ایجنسیوں کے غلط استعمال کا الزام لگاتے ہوئے ہنگامہ آرائی شروع کردی اور نعرے بازی شروع کردی۔ اسپیکر نے ہنگامہ آرائی کے درمیان وقفہ سوالات چلانے کی کوشش کی اور ہنگامہ آرائی کے درمیان وقفہ سوالات تقریباً 40 منٹ تک جاری رہا۔ اس دوران حکومت نے ایوان میں کئی سوالوں کے جواب دیے ۔ہنگامہ آرائی کرنے والے ارکان کو اپنی نشستوں پر جانے کی تلقین کرتے ہوئے اسپیکر نے کہا کہ انہیں وقفہ سوالات کے بعد اظہار خیال کا موقع دیا جائے گا تاہم ارکان نے ہنگامہ آرائی جاری رکھی جس کی وجہ سے ایوان کی کارروائی دو بجے تک ملتوی کرنی پڑی۔