1.4 لاکھ صارفین  نے پہلے دن نیا FASTag سالانہ پاس خریدا

نئی دہلی۔ 16؍ اگست۔ ایم این این۔نیشنل ہائی ویز اتھارٹی آف انڈیا نے ملک بھر میں قومی شاہراہوں اور ایکسپریس ویز پر تقریباً 1,150 ٹول پلازوں پر ‘ سالانہ پاس’ کی سہولت کو کامیابی کے ساتھ نافذ کیا ہے۔سڑک ٹرانسپورٹ اور شاہراہوں کی وزارت کے مطابق، سالانہ پاس کو قومی شاہراہ استعمال کرنے والوں کی جانب سے زبردست ردعمل ملا ہے۔15 اگست کو نفاذ کے پہلے دن شام 7:00 بجے تک، تقریباً 1.4 لاکھ صارفین نے سالانہ پاس خریدے اور اسے چالو کیا اور ٹول پلازوں پر تقریباً 1.39 لاکھ ٹرانزیکشنز ریکارڈ کی گئیں۔ اتھارٹی  کے مطابق، تقریباً 20,000-25,000 ہم وقت صارفین راج  مارگ یاتراایپ کو کسی بھی وقت استعمال کر رہے ہیں اور سالانہ پاس صارفین کو ٹول فیس کی صفر کٹوتی کے لیے  ایس ایم ایس پیغامات موصول ہو رہے ہیں۔ نیشنل  ہائی وے اتھارٹیز کے عہدیداروں اور نوڈل افسران کو ہر ٹول پلازہ پر مقرر کیا گیا ہے تاکہ پاس استعمال کرنے والوں کے لیے سفر کے آسان تجربے کو یقینی بنایا جاسکے۔  نیشنل ہائی وے  اتھارٹیز مختلف چینلز کے ذریعے پاس استعمال کرنے والوں کے سوالات کا جواب دے رہا ہے۔ اس کے ساتھ ساتھ، پاس صارفین کی شکایات کو دور کرنے کے لیے، 1033 نیشنل ہائی وے ہیلپ لائن کو مزید مضبوط کیا گیا ہے جس میں 100 سے زیادہ ایگزیکٹیو شامل کیے گئے ہیں۔قومی شاہراہ استعمال کرنے والوں کو بغیر کسی رکاوٹ اور اقتصادی سفر کا اختیار فراہم کرتے ہوئے، FASTag کا سالانہ پاس ایک سال کی مدت یا 200 ٹول پلازہ کراسنگ کے لیے 3,000 روپے کی یک وقتی فیس کی ادائیگی کے ذریعے FASTag کو بار بار ری چارج کرنے کی ضرورت کو ختم کرتا ہے۔FASTag سالانہ پاس ایک درست FASTag کے ساتھ تمام غیر تجارتی گاڑیوں پر لاگو ہوتا ہے اور راج  مارگ  یاتراایپ یا  نیشنل ہائی  وے اتھارٹی   آف انڈیا کی  ویب سائٹ کے ذریعے ایک بار فیس کی ادائیگی کے دو گھنٹے کے اندر فعال ہو جاتا ہے۔تقریباً 98 فیصد کی رسائی کی شرح اور 8 کروڑ سے زیادہ صارفین کے ساتھ، FASTag نے ملک میں الیکٹرانک ٹول جمع کرنے کے نظام میں انقلاب برپا کر دیا ہے۔وزارت نے کہا کہ سالانہ پاس کی سہولت کا تعارف نہ صرف FASTag صارف کے تجربے میں اضافہ کرے گا بلکہ قومی شاہراہوں اور ایکسپریس ویز پر سفر کو مزید اقتصادی اور ہموار بنائے گا۔