نئی دہلی، 16 ستمبر (یو این آئی) کانگریس کے سابق صدر راہل گاندھی نے کہا ہے کہ ہندوستان نوجوانوں کا ملک ہے اور اگر نوجوانوں کی توانائی کا صحیح استعمال کیا جائے تو ملک ترقی کی نئی بلندیوں تک پہنچ سکتا ہے۔ایک فیس بک پیغام میں مسٹر گاندھی نے کہا ”ہمارا ملک ایک نوجوان ملک ہے، ہمارے پاس نوجوانوں کے طور پر بہت بڑی طاقت ہے، اگر ہم اپنے نوجوانوں کی توانائی کا صحیح استعمال کریں، انہیں صحیح سمت دکھائیں، تو ہمارا ملک بہت تیزی سے ترقی کرسکتا ہے۔ لیکن آج ملک میں گزشتہ 45 سالوں میں سب سے زیادہ بے روزگاری ہے، پڑھے لکھے نوجوان روزگار کی تلاش میں بھٹک رہے ہیں، مایوسی کی گرفت میں ہیں۔ ہمارا فرض بھی ہے اور وقت کی ضرورت بھی ہے کہ ہم اپنے نوجوانوں کی ریڑھ کی ہڈی کو مضبوط کریں، انہیں پازیٹی وٹی کی طرف لے آئیں۔انہوں نے کہا کہ وہ اپنی بھارت جوڈو یاترا کے لئے کیرلا میں ہیں اور لوگوں سے مل رہے ہیں۔ انہوں نے کہا ”میں اپنی بھارت جوڑو یاترا کے دوران بہت سارے نوجوانوں سے مل رہا ہوں، سمجھ رہا ہوں کہ ان کی حکومت سے کیا امید ہے، اپنے مستقبل کو روشن بنانے کے لئے وہ ہم سے کس کس طرح کی مدد چاہتے ہیں، ہم ان کے لیے مزید کتنے امکانات پیدا کر سکتے ہیں۔“بھارت جوڑو یاترا کی اہمیت بتاتے ہوئے انہوں نے کہا کہ ہماری بھارت جوڑو یاترا کا مقصد یہ بھی ہے کہ ہم بچے، بوڑھے، نوجوان، خواتین، مزدور، غریب، کسان اور قبائلی سب کی بات سنیں، ان کے مسائل کا حل تلاش کر سکیں۔ ہم کامیاب بھی ہو رہے ہیں، نوجوان ہم سے کھل کر بات کر رہے ہیں، ساتھ چل رہے ہیں۔ مجھے امید ہے کہ ہم سب مل کر اپنے ہندوستان کو متحد کریں گے اور اسے آگے لے جائیں گے۔