کولگام میں گرینیڈحملے میں زخمی پولیس اہلکار فوت

ضلع کولگام کے کیموہ علاقے میں نامعلوم اسلحہ برداروں کے گرینیڈ حملے میں جموں وکشمیر پولیس کے ایک جوان کی موت ہوگئی ہے۔ کیموہ کولگام میں اُس وقت سنسنی اور خوف ودہشت کا ماحول پھیل گیا جب مشتبہ جنگجووں نے گزشتہ رات ایک پولیس ٹیم پر گرینیڈ پھینکا جو زور دار دھماکے کے ساتھ پھٹ گیا جس کے نتیجے میں ایک اہلکار شدید طورپر زخمی ہوا۔ معلوم ہوا ہے کہ زخمی پولیس اہلکار کو علاج ومعالجہ کی خاطر گورنمنٹ میڈیکل کالج اننت ناگ منتقل کیا گیا تاہم وہ جانبر نہ ہو سکا۔ پولیس اہلکار کی شناخت طاہر خان کے طور پر ہوئی ہے جو پونچھ،ضلع کے مینڈھر علاقے سے تعلق رکھتا ہے۔کشمیر زون پولیس نے ٹویٹ کر کے بتایا، ”گزشتہ رات کیموہ کولگام میں ایک گرینیڈ حملے کی اطلاع ملی۔ دہشت گردی کے اس واقعہ میں پونچھ کے مینڈھر سے تعلق رکھنے والا ایک پولیس اہلکار طاہر خان نامی زخمی ہوا۔ اسے علاج کے لیے جی ایم سی اسپتال اننت ناگ لے جایا گیا، جہاں اس کی موت ہوگئی”۔دریں اثنا گرینیڈ حملے کے بعد جنوبی کشمیر میں سیکورٹی فورسز کی اضافی نفری تعینات کی گئی ۔ ذرائع نے بتایا کہ جنگجووں کے امکانی حملوں کو ٹالنے کی خاطر جنوبی کشمیر میں جگہ جگہ فورسز نے ناکوں کا جال بچھایا جہاں پر ہر آنے جانے والے کی باریک بینی سے تلاشی لی جارہی ہیں۔ پولیس کے ایک سینئر عہدیدار نے خبر رساں ایجنسی کو بتایا کہ کولگام میں گرینیڈ حملے کے بعد حملہ آوروں کی تلاش شروع کی گئی ہے۔ انہوں نے بتایا کہ حملہ آوروں کی شناخت کے لئے ہیومن انٹیلی جنس کے ساتھ ساتھ ٹیکنالوجی کو بھی بروئے کارلایا جارہا ہے۔