گرفتار شدگان ہندواڑہ میں حملوں کی فراق میں تھے /پولیس بیان
جموں وکشمیر پولیس او رفوج نے ہندواڑہ میں دو جنگجووں کو اسلحہ وگولہ بارود سمیت دھر دبوچ کر سلاخوں کے پیچھے دھکیل دیا ۔ پولیس ذرائع نے بتایا کہ مصدقہ اطلاع موصول ہونے کے بعد سیکورٹی فورسز نے ہندواڑہ میں ناکہ لگایا جس دوران سلامتی عملے نے تین مشتبہ افراد کو رکنے کا اشارہ کیا چنانچہ تینوں نے وہاں سے بھاگنے کی کوشش کی تاہم سیکورٹی فورسز نے اُن تعاقب کیا اور بعد میں تینوں کی گرفتاری عمل میں لائی گئی۔ پولیس ذرائع کے مطابق سیکورٹی فورسز نے جامہ تلاشی کے دوران گرفتار شدگان کے قبضے سے ایک پستول ، ایک پستول میگزین، سات گولیوں کے راونڈ اور دو گرنیڈ برآمد کئے۔ پولیس کا کہنا ہے کہ ابتدائی تفتیش کے دوران پتہ چلا ہے کہ مذکورہ جنگجو ہندواڑہ میں حملوں کی منصوبہ بندی کر رہے تھے تاہم عین موقع پر تینوں کو حراست میں لے لیا گیا۔ پولیس ذرائع نے بتایا کہ گرفتار شدگان سے پو چھ تاچھ جاری ہے اور مزید انکشافات متوقع ہے۔ بتادیں کہ یوم آزادی کے پیش نظر وادی بھر میں سیکورٹی الرٹ جاری کردیا گیا ہے۔ ذرائع کا کہنا ہے کہ ملی ٹینٹوں کے امکانی حملوں کو ٹالنے کی خاطر وادی بھر میں سیکورٹی فورسز کو چوبیس گھنٹے متحرک رہنے کے احکامات صادر کئے گئے ہیں۔