پاکستان میں حکومتی ریفرنس کی سماعت کیلئے لارجر بینچ کی تشکیل کا فیصلہ

سیاسی جماعتوں کو آئینی اور قانونی طریقہ سے پارلیمنٹ میں اپنی طاقت دکھانی چاہیے: چیف جسٹس
اسلام آباد: ۱۲ مارچ (ایجنسیز) پاکستان کی سپریم کورٹ میں آئین کے آرٹیکل 63 اے کی تشریح کیلئے دائر صدارتی ریفرنس اور سپریم کورٹ بار ایسوسی ایشن کی درخواست پر سماعت کے دوران چیف جسٹس عمر عطا بندیال نے کہا ہے کہ ’سیاسی جماعتوں کو آئینی اور قانونی طریقہ سے پارلیمنٹ میں اپنی طاقت دکھانی چاہیے۔‘ سوموار کو سماعت کرتے ہوئے چیف جسٹس سپریم کورٹ نے کہا کہ ہم چاہتے ہیں تمام سیاسی جماعتیں اپنے ورکرز کو بتائیں کہ ہمیں آئین میں موجود طریقہ کار کے مطابق اس عمل کو آگے بڑھانا ہے۔ سندھ ہاو¿س میں جو ہوا ہے اس سے ارکان اسمبلی کے ووٹنگ کے حق متاثر ہوا ہے۔ یاد رہے کہ وفاقی حکومت نے سپریم کورٹ میں آئین کے آرٹیکل 63 اے کی تشریح کیلئے صدارتی ریفرنس دائر کیا۔ اٹارنی جنرل آف پاکستان خالد جاوید خان نے صدر کی منظوری کے بعد پیر کو صدارتی ریفرنس دائر کیا۔ تحریک انصاف کی حکومت نے چند روز قبل منحرف ہو جانےوالے اپنے ارکانِ اسمبلی کے مواخذے کیلئے یہ ریفرنس دائر کیا۔ سماعت کے دوران اپوزیشن لیڈر اور مسلم لیگ نواز کے صدر شہباز شریف، پی ڈی ایم کے سربراہ مولانا فضل الرحمان اور چیئرمین پیپلز پارٹی بلاول بھٹو زرداری بھی سپریم کورٹ میں موجود تھے۔