ہزاروں ہندوستانی طلباءیوکرین میں پھنس گئے، اِن کی واپسی کا انتظار

نئی دہلی(ایجنسیز/یو این آئی) روس کی جانب سے یوکرین میں فوجی کارروائی کے اعلان کے پیش نظر وہاں پھنسے ہوئے ہندوستانی طلباءکو لانے کیلئے ائر انڈیا کی خصوصی پرواز کو یوکرین کی جانب سے شہری پروازوں کیلئے اپنی فضائی حدود بند کرنے کے بعد واپس بلالیاگیا ہے۔ ائر انڈیا کے ایک اہلکار نے کہاکہ یوکرین کی پرواز AI1947 کو واپس بلالیاگیا۔ انہوں نے کہا کہ ہندوستانیوں بالخصوص یوکرین سے طلباءکو واپس لانے کیلئے صبح تقریباً 7.30 بجے فلائٹ نے اڑان بھری تھی۔ائرانڈیا نے روس اور یوکرین کے درمیان فوجی تصادم کے تناظر میں ہندوستانیوں کو واپس لانے کیلئے یوکرین کیلئے تین خصوصی پروازیں چلانے کا اعلان کیا تھا۔ دریں اثنا یوکرین انٹرنیشنل ایئر لائنز (یو آئی اے) کی ایک خصوصی پرواز 182 ہندوستانیوں کے ساتھ جمعرات کو یوکرین سے دہلی پہنچ گئی۔بتایا جاتا ہے کہ کئی ہزار ہندوستانی طلباءاب بھی یوکرین میں پھنسے ہوئے ہیں اور ان کی واپسی کا انتظار کیا جارہا ہے۔ دریں اثناءبحران زدہ یوکرین میں کیف ہوائی اڈے کے بند ہونے کے بعد ہندوستانی حکومت اپنے شہریوں کو نکالنے کیلئے متبادل راستے تلاش کر رہی ہے اور نجی ایئر لائنز کے ساتھ رابطے میں ہے۔ دریں اثنا، یوکرین کی صورتحال کے حوالے سے دارالحکومت دہلی میں واقع وزارت خارجہ میں ایک اعلیٰ سطحی میٹنگ ہو رہی ہے۔ ذرائع نے بتایا کہ یوکرین میں وہاں رہنے والے ہندوستانیوں کے محفوظ انخلاءکیلئے ہنگامی منصوبہ بندی پر بھی غور کیا جا رہا ہے۔