خاتون پر تیز دھار والے ہتھیار سے وار کرکے سونے کے زیورات اُڑا کر فرار ہوئے

وادی کشمیر میں نقب زنوں کی جانب سے اب لوگوں پر حملہ آور ہونے کا سلسلہ شروع کیا گیا ہے۔ بٹہ مالوکے بعد کولگام میں نامعلوم چوروں نے رہائشی مکان میں گھس کر اُس پر تیز دھار والے ہتھیار سے حملہ کرکے دو سونے کی انگوٹھیوں پر ہاتھ صاف کیا۔ پولیس نے معاملے کی نسبت کیس درج کرکے حملہ آوروں کی تلاش شروع کی ہے۔ اطلاعات کے مطابق کولگام کے آگرو گاوں میں ہفتے کے روز اُس وقت سنسنی اور خوف ودہشت کا ماحول پھیل گیا جب چوروں نے انگوٹھیاں چُرانے کی خاطر خاتون کی انگلی ہی کاٹ ڈالی۔ نمائندے نے بتایا کہ سنیچر کے روز نامعلوم نقب زن آگرو گاوں میں ایک رہائشی مکان کے اندر گھس گئے اور وہاں فینسی جان زوجہ محمد یونس راتھر سے طلائی زیورات چُرانے کی خاطر اُس کی انگلی پر تیز دھار والے ہتھیار سے وار کیا۔ مقامی لوگوں نے بتایا کہ چوروں نے خاتون سے زبردستی دو سونے کی انگوٹھیاں چُرا ئیں اور وہاں سے فرار ہونے میں کامیاب ہوئے۔ مقامی لوگوں کے مطابق خاتون کی انگلیاں زخمی ہوئی اور اُس کو علاج ومعالجہ کی خاطر ہسپتال لے جایا گیا۔ پولیس نے اس ضمن میں کیس درج کرکے مزید تحقیقات شروع کی ہے۔