ابر آلود موسمی صورتحال کے بیچ محکمہ موسمیات نے آئندہ 24گھنٹوں کے دوران پیر پنچال کے آر پار ہلکی بارشوں کی پیشگوئی کی ہے ۔ ادھر وادی کشمیر میں خشک موسم کے چلتے بیشتر مقامات پر درجہ حرارت نقطہ انجماد سے نیچے درج ہوا ہے۔ سرینگر میں شبانہ درجہ حرارت 0.8 ڈگری جبکہ شہرہ آفاق سیاحتی مقام گلمرگ میں منفی7.6 ڈگری اور پہلگام میں کم سے کم درجہ حرارت منفی4.8 ڈگری سینٹی گریڈ ریکارڈ کیا گیا ۔ اطلاعات کے مطابق وادی کشمیر میں گزشتےہ کئی دنوں دن بھر کھلی دھوپ نکلنے کے باعث بہار جیسا سماں لگ رہا تھا تاہم جمعہ کی صبح سے ایک بار پھر موسمی صورتحال میں تبدیلی آئی اور دن بھر آسمان ابر آلود رہنے کے نتیجے میں سردی کی لہر واپس لوٹ آئی ۔ ادھر خشک موسم کے چلتے شبانہ سردیوں کی لہر جاری ہے اور سرینگر اور کپوارہ کو چھوڑ کر وادی کے باقی علاقوں میں شبانہ درجہ حرارت نقطہ انجماد سے نیچے ریکارڈ ہوا ہے۔محکمہ موسمیات کے مطابق سرینگر میں شبانہ درجہ حرارت 0.8 ڈگری سینٹی گریڈ ریکارڈ کیا گیا جہاں گذشتہ شب کا کم سے کم درجہ حرارت منفی1.0 ڈگری سینٹی گریڈ ریکارڈ ہوا تھا۔شہرہ آفاق سیاحتی مقام گلمرگ میں کم سے کم درج حرارت منفی7.6 ڈگری سینٹی گریڈ ریکارڈ کیا گیا جہاں گذشتہ شب کم سے کم درجہ حرارت منفی7.3 ڈگری سینٹی گریڈ ریکارڈ ہوا تھا۔وہی مشہور سیاحتی مقام پہلگام میں کم سے کم درجہ حرارت منفی4.8 ڈگری سینٹی گریڈ ریکارڈ کیا گیا جہاں گذشتہ شب کم سے کم درجہ حرارت منفی4.5 ڈگری سینٹی گریڈ ریکارڈ ہوا تھا۔ضلع کپوارہ میں کم سے کم درجہ حرارت 1.6 ڈگری سینٹی گریڈ ریکارڈ کیا گیا جہاں گذشتہ شب کا کم سے کم درجہ حرارت منفی2.3 ڈگری سینٹی گریڈ ریکارڈ ہوا تھا۔تھا۔لداخ کے قصبہ دراس جو سائبیریا کے بعد دنیا کا دوسرا سرد ترین علاقہ ہے، میں کم سے کم درجہ حرارت منفی18.9 ڈگری سینٹی گریڈ ریکارڈ کیا گیا جبکہ ضلع کرگل میں کم سے ک درجہ حرارت منفی 14.8 ڈگری سینٹی گریڈ اور ضلع لیہہ میں منفی13.1 ڈگری سینٹی گریڈ ریکارڈ کیا۔ ادھر محکمہ موسمیات نے پیشگوئی کرتے ہوئے کہا کہ جموں وکشمیر میں اگلے چوبیس گھنٹوں کے دوران موسم ابر آلود رہنے کا امکان ہے اور اس دوران کہیں کہیں ہلکے درجے کی بارش بھی ہوسکتی ہے۔انہوں نے کہا کہ بعد ازاں وادی میں 21 فروری تک موسم خشک رہنے کی توقع ہے۔