ہندوستانی شہریوں کو یوکرین چھوڑنے کی ہدایت

سفارت خانے کی ایڈوائزری جاری ، شہریوں سے تمام غیر ضروری سفر سے گریز کرنے کی ہدایت
کیفنئی دہلی(یو این آئی) یوکرین کی سرحدوں پر روسی فوجیوں کی تعیناتی اور اس پر روسی حملے کے خدشے کے درمیان دارالحکومت کیف میں ہندوستانی سفارت خانے نے منگل کو اپنے شہریوں بالخصوص طلباءکو موجودہ صورتحال اور بے یقینی کی فضا کا حوالہ دیتے ہوئے عارضی طور پر ملک چھوڑنے کو کہا ہے ۔ ہندوستانی سفارت خانے نے ایک ایڈوائزری بھی جاری کی ہے جس میں اپنے تمام شہریوں سے کہا گیا ہے کہ وہ یوکرین کے اندر تمام غیر ضروری سفر سے گریز کریں۔سفارت خانے نے تمام ہندوستانیوں سے کہا کہ وہ یوکرین میں اپنے ٹھکانے کے بارے میں سفارت خانے کو مطلع کریں تاکہ ضرورت پڑنے پر ان تک پہنچا جا سکے ۔ سفارت خانہ فی الحال معمول کے مطابق کام کرتا رہے گا۔ ایڈوائزری میں کہا گیا ہے کہ یوکرین کی موجودہ غیر یقینی صورتحال کو دیکھتے ہوئے یوکرین میں ہندوستانی شہری خاص طور پر ایسے طلباءجنہیں قیام کی ضرورت نہیں ہے ، عارضی طور پر جانے پر غور کر سکتے ہیں۔ ہندوستانی شہریوں کو یوکرین کے اندر تمام غیر ضروری سفر سے گریز کرنے کی ہدایت دی جاتی ہے ۔ہندوستانی شہریوں سے درخواست کی جاتی ہے کہ وہ یوکرین میں اپنی موجودگی کے بارے میں سفارت خانے کو آگاہ رکھیں تاکہ ضرورت پڑنے پر ان تک پہنچا جاسکے ۔ روس نے یوکرین کی سرحد پر ایک لاکھ سے زائد فوجی تعینات کر رکھے ہیں، جس سے حملے کا خدشہ بڑھ گیاہے ۔جرمن چانسلر اولاف شولز نے پیر کے روز یوکرین کا دورہ کیا اور آج ماسکو کا دورہ کرنے کا ارادہ رکھتے ہیں۔اطلاعات کے مطابق یہ ممکنہ روسی حملے کو روکنے کی آخری کوشش ہے ۔مسٹر شولز نے پہلے یوکرین پر کسی بھی روسی حملے کے خلاف واضح انتباہ جاری کیا تھا۔ انہوں نے کہا کہ کسی بھی روسی جارحیت کے بڑے معاشی نتائج ہوں گے ، یوکرین کی علاقائی سالمیت پر کوئی سمجھوتہ نہیں کیا جائے گا۔