پہلے ووٹ دیں، پھر ناشتہ!: مودی

پرینکا گاندھی کی رائے دہندگان سے ووٹ کی طاقت کو استعمال کر نے کی اپیل
نئی دہلی(یو این آئی) وزیر اعظم نریندر مودی، مرکزی وزیر داخلہ امت شاہ اور وزیر دفاع راجناتھ سنگھ نے اترپردیش اسمبلی انتخابات کیلئے پہلے مرحلے کی پولنگ شروع ہونے کے بعد ووٹروں سے بڑھ چڑھ کر اور انتہائی جوش و خروش سے اپنے حق رائے دہی کا استعمال کرنے کی اپیل کی۔ مسٹر مودی نے ٹویٹ کیا، ‘اتر پردیش اسمبلی انتخابات میں آج ووٹنگ کا پہلا مرحلہ ہے۔ میں تمام ووٹروں سے درخواست کرتا ہوں کہ وہ کووڈ کے اصولوں پر عمل کرتے ہوئے جمہوریت کے اس مقدس تہوار میں جوش و خروش سے حصہ لیں۔ یاد رکھیں، پہلے ووٹ دیں، پھر ناشتہ!” دریں اثناءکانگریس جنرل سکریٹری اور ریاست میں پارٹی کی انتخابی انچارج پرینکا گاندھی واڈرا نے اتر پردیش میں اسمبلی انتخابات کا پہلا مرحلہ شروع ہونے پر ووٹروں سے ریاست کے بہتر مستقبل کیلئے اپنے ووٹ کی طاقت استعمال کرنے کی اپیل۔ مسز واڈرا نے ٹویٹ کیا”مغربی اتر پردیش کے میری پیاری بہنوں اور بھائیوں، اپنے مسائل اور ریاست کے بہتر مستقبل کی تعمیر کے لیے ووٹ کی طاقت کا استعمال کریں۔ میرے تمام ساتھیوں، کارکنوں اور یوپی کانگریس کے امیدواروں کو نیک خواہشات – آپ کو فخر ہونا چاہیے کہ 30 سال بعد ہم تمام سیٹوں پر اپنی طاقت کے ساتھ لڑ رہے ہیں“۔ انہوں نے آج کی پولنگ کے حوالہ سے کرمیوگ فلسفہ سے متعلق گیتا کے ایک شلوک کا بھی حوالہ دیا۔