سانبہ میں بین الاقوامی سرحد پر تین پاکستانی اسمگلر ہلاک

مہلوکین کے قبضے سے بڑی مقدار میں نشیلی اشیاءضبط کی گئی /بی ایس ایف ترجمان
سانبہ میں بین الاقوامی سرحد پر بی ایس ایف نے تین پاکستانی اسمگلروں کو جاں بحق کرنے کا دعویٰ کیا ہے اور اُن کے قبضے سے بڑی مقدار میں ممنوع نشیلی اشیاءبرآمد کی گئی ہے۔ تفصیلات کے مطابق سانبہ میں بین الاقوامی کنٹرول لائن پر بی ایس ایف نے تین پاکستانی دراندازوں کو مار گرانے کا دعویٰ کیا ہے۔ بی ایس ایف ترجمان نے بتایا کہ سنیچر اور اتوار کی درمیانی رات کو بارڈر سیکورٹی فورسز نے فینسنگ کے نزدیک چند افراد کی نقل وحرکت دیکھی جس کے بعد اُنہیں للکارا گیا۔ انہوں نے کہاکہ اگر چہ دراندازی کرنے والے ان تین افراد کو کئی مرتبہ واپس جانے کے ضمن میں ہوا میں گولیاں چلائیں تاہم وہ اس طرف آنے پر بضد تھے جس کے بعد بی ایس ایف اہلکاروں نے اُن پر فائرنگ کی جس کے نتیجے میں تینوں مارے گئے۔ انہوںنے بتایا کہ مہلوکین کے قبضے سے بڑی مقدار میں ہیروئن برآمد کرکے ضبط کی گئی ہے۔ ڈی آئی جی بی ایس ایف نے اسکی تصدیق کرتے ہوئے بتایا کہ مستعد اہلکاروں نے پاکستانی اسمگلروں کی کوشش کو ناکام بنایا ہے۔ انہوںنے بتایا کہ مذکورہ افرا دنشیلی اشیاءکی ایک بڑی کھیپ لے کر اس طرف آرہے تھے کہ اُنہیں عین موقع پر مار گرایا گیا ہے۔