ہماچل میں شدید برف باری سے معمولات زندگی بری طرح متاثر

شملہ(یو این آئی) ہماچل پردیش میں شدید برف باری کی وجہ سے شملہ سمیت اونچائی والے علاقوں میں حالات اتنے خراب ہو گئے ہیں کہ لوگوں کو دودھ اور روٹی تک نہیں مل رہی ہے۔شملہ کا سڑک کا رابطہ دیگر علاقوں سے منقطع ہو گیا۔ شہر کی اہم سڑکوں کے علاوہ میونسپل کارپوریشن کی تمام رابطہ سڑکیں صبح کے وقت بند رہیں لیکن جنگی بنیادوں پر کام کے بعد آج سہ پہر کچھ سڑکوں کو کھول دیا گیا۔ درختوں پر برف کی وجہ سے درخت ٹوٹ رہے ہیں۔ کل شام تک 12 سے زائد درخت گر چکے ہیں۔ یہ درخت گھروں، بجلی کی تاروں اور گاڑیوں پر گرے جس سے بڑی تباہی ہوئی۔اگرچہ ہفتہ کی صبح شملہ میں دھوپ تھی جس کی وجہ سے لوگوں نے راحت کی سانس لی لیکن سڑک بند ہونے سے مشکلات میں اضافہ ہوگیا ہے۔ تاہم مقامی انتظامیہ انتظامات کو درست کرنے میں مصروف ہے۔ شہر کی بند سڑکوں اور گلیوں سے برف ہٹائی جا رہی ہے۔ شہر میں ایک فٹ سے زائد برفباری کے باعث چاروں طرف برف ہی برف نظر آرہی ہے۔ شہر میں ہفتہ کی صبح دودھ اور روٹی کی سپلائی نہیں ہوسکی۔شدید برف باری کے پیش نظر شہر کے سرکاری دفاتر میں آج تعطیل کا اعلان کیا گیا ہے۔ شملہ سمیت پورے ہماچل پردیش میں ٹرانسپورٹ خدمات ٹھپ ہو کر رہ گئی ہیں۔ پورے ضلع میں 303 سڑکیں، 685 پاور ٹرانسفارمر بند ہیں۔ پینے کے پانی کے 28 منصوبے بھی تعطل کا شکار ہیں۔ شملہ کو دارالحکومت سے جوڑنے والی قومی شاہراہ پانچ دن گزرنے کے بعد بھی بحال نہیں ہوسکی ہے، کئی مقامات پر سیاحوں کی گاڑیاں برف میں پھنسی ہوئی ہیں۔