دسمبر31 تک موسم خشک رہنے کی پیش گوئی

محکمہ موسمیات نے وادی کشمیر میں نئے سال کی آمد تک موسم مجموعی طور پر خشک رہنے کی پیش گوئی کی ہے۔ادھر مطلع صاف رہنے سے وادی کے بیشتر مقامات پر شبانہ درجہ حرارت ایک بار پھر نقطہ انجماد سے نیچے درج کیا گیا جس سے سردی کی شدت میں ایک پھر اضافہ محسوس کیا گیا۔محکمہ موسمیات کے ماہرین نے بتایاکہ رواں موسمی صورتحال جاری رہنے تک دن کے درجہ حرارت میں بہتری اوررات کے درجہ حرارت میں کمی واقعہ ہوگی ،یعنی سال رواں کے آخر تک دن گرم اورراتیں سردہونگی۔ محکمہ موسمیات کے ایک ترجمان نے کہا کہ جموں و کشمیر اور لداخ یونین ٹریٹری میں31 دسمبر تک موسم مجموعی طور پر خشک رہنے کا امکان ہے۔انہوں نے کہا کہ اس دوران دن کے درجہ حرارت میں بہتری متوقع ہے تاہم راتیں سرد سے سرد تر ہوسکتی ہیں۔گرمائی دارلحکومت سری نگر میں کم سے کم درجہ حرارت 1.4 ڈگری سینٹی گریڈ ریکارڈ کیا گیا جہاں گذشتہ شب کا کم سے کم درجہ حرارت منفی2.2 ڈگری سینٹی گریڈ ریکارڈ ہوا تھا۔وادی کے مشہور دہر سیاحتی مقام گلمرگ میں کم سے کم درجہ حرارت منفی9.4 ڈگری سینٹی گریڈ ریکارڈ کیا گیا جہاں گذشتہ شب کا کم سے کم درجہ حرارت منفی6.0 ڈگری سینٹی گریڈ ریکارڈ ہوا تھا۔گلمرگ میں اس وقت سینکڑوں کی تعداد میں غیر مقامی سیاح موجود ہیں جو وہاں ہونے والی تازہ برف باری سے لطف اندوز ہو رہے ہیں۔وادی کے دوسرے مشہور سیاحتی مقام پہلگام میں کم سے کم درجہ حرارت منفی7.9 ڈگری سینٹی گریڈ ریکارڈ کیا گیا جہاں گذشتہ شب کا کم سے کم درجہ حرارت منفی4.1 ڈگری سینٹی گریڈ ریکارڈ ہوا تھا۔سرحدی ضلع کپوارہ میں کم سے کم درجہ حرارت منفی1.0 ڈگری سینٹی گریڈ ریکارڈ کیا گیا جہاں گذشتہ شب کا کم سے کم درجہ حرارت 1.5ڈگری سینٹی گریڈ ریکارڈ ہوا تھا۔کپوارہ میں گذشتہ چوبیس گھنٹوں کے دوران3.9 ملی میٹر بارش بھی ریکارڈ ہوئی ہے۔ادھرجنوبی قصبہ قاضی گنڈ میں کم سے کم درجہ حرارت منفی0.4 ڈگری سینٹی گریڈ ریکارڈ کیا گیا جہاں گذشتہ شب کا کم سے کم درجہ حرارت 1.2 ڈگری سینٹی گریڈ ریکارڈ ہوا تھا۔قاضی گنڈ میں گذشتہ چوبیس گھنٹوں کے دوران4.0 ملی میٹر بارش ریکارڈ ہوئی ہے۔دریں اثنا وادی کے میدانی علاقوں میں منگل کو سردیوں کے بادشاہ چلہ کلان کے ساتویں روز موسم خشک مگر ابر آلود رہا۔قابل ذکر ہے کہ وادی کشمیر میں خشک موسم مگر ٹھٹھرتی شبانہ سردیوں کے بیچ سردیوں کا بادشاہ ’چلہ کلان’سوموار اورمنگل کی درمیانی شب یعنی21 دسمبر سے اپنے 40 روزہ مسند اقتدار پر پوری آب وتاب کے ساتھ جلوہ افروز ہوگیا۔چلہ کلان جو ’شہنشاہ زمستان‘ کے نام سے بھی وادی کے قرب وجوار میں مشہور ہے،21 دسمبر سے شروع ہو کر31 جنوری کو اختتام پذیر ہوتا ہے۔