رام بن کے بٹوت میں سڑک حادثہ،19 سالہ نوجوان از جان دو زخمی

کولگام میں سی آر پی ایف گاڑی کوحادثہ تین اہلکار مضروب
رام بن کے بٹوٹ میں سڑک حادثہ 19سالہ نوجوان از جان دو زخمی جبکہ کولگام میں پیرا ملٹری فورسز کی گاڑی کو حادثہ پیش آنے کے نتیجے میں تین اہلکار زخمی ہوئے۔ جموں و کشمیر کے ضلع رام بن کے بٹوٹ علاقے میں جمعے کی صبح ایک دلدوز سڑک حادثے میں ایک نوجوان از جان جبکہ دو دیگر زخمی ہوگئے۔ذرائع نے بتایا کہ رام بن کے بھاگو نالہ بٹوٹ علاقے میں جمعے کی صبح قریب ساڑھے سات بجے ایک کار سڑک سے لڑھک گئی جس کے نتیجے میں اس میں سوار ایک نوجوان کی بر سر موقع ہی موت واقع ہوئی جبکہ دو دیگر زخمی ہوگئے۔انہوں نے کہا کہ یہ کار بھدرواہ سے جموں جا رہی تھی۔متوفی نوجوان کی شناخت 19 سالہ وکاس کمار ولد سنجے کمار ساکن بھدرواہ کے بطور ہوئی ہے۔زخمیوں، جنہیں علاج و معالجے کے لئے نزدیکی ہسپتال منتقل کیا گیا ہے، کی شناخت 27 سالہ راہل آنند ولد دھونی چند اور 22 سالہ شیو پرکاش ولد دھونی چند ساکنان بھدرواہ کے بطور ہوئی ہے۔دریں اثنا پولیس نے اس ضمن میں ایک کیس درج کرکے تحقیقات شروع کی ہیں۔دریں اثنا کولگام میں پیرا ملٹری فورسز کی گاڑی ڈرائیور کے قابو سے باہر ہو کر سڑک پر اُلٹ گئی جس وجہ سے تین اہلکار زخمی ہوئے جنہیں علاج ومعالجہ کی خاطر نزدیکی اسپتال منتقل کیا گیا۔