سری نگر میں ایک اور سرد ترین رات درج،23سے 25دسمبر تک برف باری کا امکان

وادی کشمیر میں چلہ کلان سے چند روز قبل ہی پوری وادی میں سخت سردی جاری ہے جس کے نتیجے میں لوگ صبح اور شام کے اوقات کے دوران گھروںسے نکلنے میں احتیاط کر رہے ہیں جبکہ محکمہ موسمیات نے بتایا کہ 23دسمبر کو وادی میں ہلکی برف باری کی پیش گوئی کی ہے ۔ وادی کشمیر میں سردیوں کے بادشاہ چالیس روزہ ’چلہ کلان‘ جیسی سردیوں کا راج برابر جاری ہے جس نے لوگوں کا جینا دو بھر کرکے رکھ دیا ہے ادھر محکمہ موسمیات نے جموں وکشمیر میں 23 دسمبر سے 25 دسمبر تک درمیانی درجے سے باری برف باری کی پیش گوئی کر دی ہے۔متعلقہ محکمے کے ایک ترجمان نے کہا کہ وادی میں 22دسمبر تک موسم مجموعی طور پر خشک رہنے کا امکان ہے۔گرمائی دارلحکومت سری نگر میں ایک اور سرد ترین رات ریکارڈ ہوئی جب جمعرات اور جمعے کی درمیانی شب کم سے کم درجہ حرارت منفی3.8 ڈگری سینٹی گریڈ ریکارڈ کیا گیا۔سری نگر میں 15 دسمبر کو رواں موسم کی سرد ترین رات ریکارڈ ہوئی تھی جب کم سے کم درجہ حرارت منفی3.9ڈگری سینٹی گریڈ ریکارڈ ہوا تھا۔وادی کے شہرہ آفاق سیاحتی مقام گلمرگ میں کم سے کم درجہ حرارت منفی8.6 ڈگری سینٹی گریڈ ریکارڈ کیا گیا جہاں گذشتہ شب کا کم سے کم درجہ حرارت منفی10.0 ڈگری سینٹی گریڈ ریکارڈ ہوا تھا۔وادی کے دوسرے مشہور سیاحتی مقام پہلگام میں کم سے کم درجہ حرارت منفی5.6 ڈگری سینٹی گریڈ ریکارڈ کیا گیا جہاں گذشتہ شب کا کم سے کم درجہ حرارت منفی6.9 ڈگری سینٹی گریڈ ریکارڈ ہوا تھا۔ادھر پوری وادی میں دن میں کھلی دھوپ تھی تاہم صبح اور شام کے اوقات کے دوران شدید سردی محسوس کی جا رہی ہے ۔