جموں و کشمیرکووعدے کے مطابق مناسب وقت پر ریاستی درجہ ، دفعہ370 دہشت گردی پھیلنے کی وجہ

خصوصی حیثیت کی بحالی سے متعلق اسمبلی کی قرارداد نیم دلانہ
ہم نے جو کہا،کیا: آرٹیکل 370 کی منسوخی ،ایودھیا میں رام مندر بنایا، UCCبھی لاگو کریں گے
10سالوں میںجموں وکشمیر،شمال مشرق اور نکسل متاثرہ علاقوں میں 16ہزار جوانوں کی خودسپردگی
بی جے پی ملک میں کم از کم 30 سال تک مرکز میں برسر اقتدار رہے گی: مرکزی وزیر داخلہ امت شاہ
سری نگر:: مرکزی وزیر داخلہ امت شاہ نے کوئی ٹائم لائن بتائے بغیر کہا ہے کہ جموں و کشمیر میں ریاست کا درجہ پہلے کے وعدے کے مطابق بحال کیا جائے گا۔انہوںنے خصوصی حیثیت کی بحالی سے متعلق اسمبلی کی قرارداد نیم دلانہ قرار دیتے ہوئے کہاکہ فریقین نے جموں و کشمیر اسمبلی کی قرارداد کو آدھے دل سے کہا۔ پی ڈی پی نے ترامیم کی تجویز پیش کی۔وزیرداخلہ نے کہاکہ ہم نے جو کہا،کیا: آرٹیکل 370 کی منسوخی ،ایودھیا میں رام مندر بنایا، UCCبھی لاگو کریں گے۔انہوںنے ساتھ ہی یہ بھی کہاکہ بی جے پی ملک میں کم از کم 30 سال تک مرکز میں برسر اقتدار رہے گی۔جے کے این ایس مانٹرینگ ڈیسک کے مطابق جمعہ کی رات نجی نیوز چینل’ ٹائمز نو سمٹ 2025 میں اظہار خیال کرتے اورسوالات کاجواب دیتے ہوئے مرکزی وزیر داخلہ امت شاہ نے کہاکہ ہم نے یقین دہانی کرائی ہے کہ جموں وکشمیرکو ریاست کا درجہ بحال کیا جائے گا۔اس سوال کہ کیا ریاستی درجے کی بحالی کیلئے کوئی ٹائم لائن ہے ،وزیرداخلہ امت شاہ کا کہناتھاکہ شروع سے ہی ہم نے کہا ہے کہ ریاست کا درجہ دیا جائے گا۔ لیکن یہ ظاہر نہیں کیا جا سکتا کہ یہ عوامی فورم پر کب دیا جائے گا۔انہوںنے ساتھ ہی کہاکہ دفعہ 370 کی وجہ سے کشمیر میں دہشت گردی پھیلی۔امت شاہ نے کہا کہ جموں و کشمیر میں گزشتہ سال پرامن طریقے سے اسمبلی انتخابات ہوئے تھے۔انہوں نے کہا کہ کشمیر میں40 سال کے بعد یہ پہلا الیکشن تھا جس میں کسی بھی جگہ دوبارہ پولنگ نہیں ہوئی، ایک بھی آنسو گیس یا گولی نہیں چلائی گئی۔ 60 فیصد لوگوں نے اپنا حق رائے دہی استعمال کیا، یہ ایک بہت بڑی تبدیلی ہے۔