جموں و کشمیر ایک مرکز کے زیر انتظام علاقہ،لیفٹیننٹ گورنر فی الحال انتظامی سربراہ :مرکزی وزیرکرن رججیو

ریاست کی حیثیت اچھی طرح سے طے شدہ اختیارات اور افعال کےساتھ مناسب وقت پر بحال کی جائے گی
 کہاسالانہ بجٹ کی مختص رقم یونین ٹیریٹری کی حیثیت کے مطابق ہے،باغبانی اور دستکاری کےلئے کافی ریلیف
سری نگر: ۵۱،فروری:جے کے این ایس : مرکزی حکومت نے ہفتہ کے روزیہ واضح کیاکہ جموں و کشمیرکو ریاستی درجہ دینے کےلئے کوئی ٹائم لائن نہیں ہے۔ مرکزی وزیر کرن رجیجو نے کہاکہ جموں و کشمیر کی ریاستی حیثیت کو بحال کیا جائے گا لیکن اس عمل کےلئے ایک قطعی ٹائم لائن فراہم کرنے سے روک دیا گیا۔انہوںنے کہاکہ اگست2019 میں آرٹیکل370 کی منسوخی نے خطے(جموں وکشمیر) میں ترقی اور پیش رفت کے ایک نئے دور کا آغاز کیا ہے۔مالی سال2025-25کیلئے جموں و کشمیر کےلئے بجٹ میں تخفیف میں کمی پر،کرن رجیجو نے کہا کہ موجودہ مالی سال میں مرکز کے زیر انتظام علاقے کی خرچ کرنے کی صلاحیت کے مطابق انتظامات کیے گئے ہیں۔جے کے این ایس کے مطابق اپنے کشمیر کے دورے کے دوران سری نگرمیں نامہ نگاروں سے بات کرتے ہوئے،پارلیمانی امورکے مرکزی وزیرکرن رجیجو نے کہا کہ وزیر اعظم نریندر مودی اور وزیر داخلہ امت شاہ دونوں نے پہلے یقین دہانی کرائی ہے کہ مقررہ وقت پر جموں وکشمیرکوریاست کا درجہ بحال کیا جائے گا۔ تاہم، جب ٹھوس ٹائم فریم کےلئے موصوف سے استفسارکیاگیا، تو انہوں نے کوئی تبصرہ کرنے سے انکار کر دیا۔کرن رجیجو نے کہاکہ وزیر اعظم اور وزیر داخلہ نے پہلے ہی اپنی پوزیشن واضح کر دی ہے کہ جموں وکشمیرکو ریاست کی حیثیت اچھی طرح سے طے شدہ اختیارات اور افعال کےساتھ مناسب وقت پر بحال کی جائے گی ۔مرکزی وزیرکرن رجیجو، جن کے پاس پارلیمانی امور اور اقلیتی امور کے قلمدان ہیں، نے اس بات پر زور دیا کہ ان کا دورہ سیاسی یا گورننس کے معاملات کے بجائے مرکزی بجٹ سے متعلق بات چیت پر مرکوز تھا۔ انہوں نے لیفٹیننٹ گورنر اور منتخب وزیر اعلیٰ کے درمیان اختیارات کی تقسیم پر سوالوں کاجوب دینے سے گریز کرتے ہوئے کہا کہ جموں و کشمیر فی الحال ایک مرکز کے زیر انتظام علاقہ ہے۔کرن رجیجونے کہا کہ وہ اس وقت ریاست کی بحالی یا لیفٹیننٹ گورنر اور منتخب چیف منسٹر کے درمیان اختیارات کی تقسیم کی ٹائم لائن پر تبصرہ نہیں کرنا چاہیں گے کیونکہ ان کا کشمیر کا دورہ صرف مرکزی بجٹ تک ہی محدود تھا۔انہوںنے کہاکہ لہذا، میں سیاسی اور گورننس کے پہلو میں قدم نہیں رکھنا چاہوں گا۔مرکزی وزیرکاکہناتھاکہ میں صرف اتنا کہہ سکتا ہوں کہ جموںو کشمیر اس وقت یونین ٹیریٹری کی حیثیت کے اندر ہے۔ لیفٹیننٹ گورنر یوٹی کے انتظامی سربراہ ہیں لیکن ہم نے ایک حکومت بھی منتخب کی ہے۔ انہوں نے کہاکہ ہماری ایک بہت کامیاب حکومت ہے جو حال ہی میں منتخب ہوئی ہے۔سری نگر میں پریس کانفرنس سے خطاب کرتے ہوئے مرکزی وزیر کرن رجیجو نے وزیر اعظم نریندر مودی کی قیادت میں جموں و کشمیر میں اہم ترقی کی پیش رفت کو اجاگر کیا ۔انہوںنے کہا کہ اگست 2019 میں آرٹیکل 370 کی منسوخی نے خطے میں ترقی اور پیش رفت کے ایک نئے دور کا آغاز کیا ہے۔مالی سال2025-25کیلئے جموں و کشمیر کےلئے بجٹ میں تخفیف میں کمی پر،کرن رجیجو نے کہا کہ موجودہ مالی سال میں مرکز کے زیر انتظام علاقے کی خرچ کرنے کی صلاحیت کے مطابق انتظامات کیے گئے ہیں۔انہوں نے کہاکہ سالانہ بجٹ کی مختص رقم یونین ٹیریٹری کی حیثیت کے مطابق ہے۔ وزیر خزانہ نے واضح کیا ہے کہ مختص اخراجات کی گنجائش کے مطابق ہے۔ انہوں نے یہ بھی کہا کہ جس رقم کی ضرورت ہوگی وہ فراہم کی جائے گی۔ اس میں مرکزی اسپانسر شدہ اسکیمیں شامل نہیں ہیں۔ انہوں نے کہا کہ وسائل کی کوئی کمی نہیں ہے۔مرکزی وزیر نے یہ بھی کہا کہ بجٹ میں باغبانی کے کسانوں اور جموں و کشمیر کے دستکاری کے کاریگروں کے لیے راحت ہے۔کرن رجیجو نے کہاکہ جمو ں وکشمیرکی ایک خاص صورتحال ہے۔ باغبانی اور دستکاری کےلئے کافی ریلیف ہے۔