کشتواڑ میں سڑک کا دلدوز حادثہ گاڑی گہری کھائی میں جاگری

چار افراد موقع پر ہی ہلاک، دو ہنوز لاپتہ ، ریسکیو آپریشن جاری
سرینگر 05جنوری//// کشتواڑ میں پیش آئے سڑک کے ایک دلدوز حادثے میں چار افراد ہلاک جبکہ دو دیگر لاپتہ ہو گئے ہیں۔ وزیر اعظم دفتر میں تعینات وزیر مملکت نے دکھ کا اظہار کیا ہے۔ یو پی آئی کے مطابق کشتواڑ کے مسو پاڈر علاقے میں اتوار کی صبح ایک گاڑی ڈرائیو رکے قابو سے باہر ہو کر گہری کھائی میں جاگری ۔ نمائندے نے بتایا کہ حادثے کی اطلاع ملتے ہی مقامی لوگ اور پولیس اہلکار جائے موقع پر پہنچے اور ریسکیو آپریشن شروع کیا جس دوران زخمی چار افراد کو علاج ومعالجہ کی خاطر نزدیکی ہسپتال منتقل کیا گیا تاہم ڈاکٹروں نے چاروں کو مردہ قرار دیا۔ متوفین کی شناخت راج کمار، مکیش کمار، حقیقت سنگھ اور ستیش کمار ساکنان پڈر کشتواڑ کے طور پر کی گئی ہے۔حکام نے بتایا کہ گاڑی میں چھ افراد سوار تھے چار کی لاشیں برآمد کی گئیں جبکہ دو کو پانی کے تیز بہاو نے بہاکرلیا جن کی بڑے پیمانے پر تلاش شروع کی گئی ہے۔ وزیر اعظم دفتر میں تعینات وزیر مملکت ڈاکٹر جتندر سنگھ نے کشتواڑ میں پیش آئے سڑک حادثے پر گہرے رنج وغم کا اظہار کرتے ہوئے لواحقین سے تعزیت کا اظہار کیا ہے۔