قو م  1971کی جنگ کےبہادر سپاہیوں کی ہمیشہ مقروض رہے گی۔  نائب صدر

 نئی دلی//۔صدر جمہوریہ محترمہ دروپدی مرمو نے وجے دیوس کے موقع پر 1971 کی جنگ کے بہادر سپاہیوں کو خراج عقیدت پیش کرتے ہوئے قوم کی قیادت کی ، جو ہر سال 16 دسمبر کو پاکستان پر ہندوستان کی تاریخی فتح کی یاد میں منایا جاتا ہے ۔ ایکس پر ایک پوسٹ میں ، صدر جمہوریہ نے کہا کہ ممنون قوم ان بہادروں کی غیرمعمولی قربانی کو یاد کرتی ہے جن کی کہانیاں ہر ہندوستانی کو متاثر کرتی ہیں  اور باعث قومی افتخار ہیں ۔مسلح افواج کی بے مثال شجاعت کا احترام کرتے ہوئے ، نائب صدر جمہوریہ جناب جگدیپ دھنکھڑ نے فوجیوں کی شجاعت  اور بے لوث قربانی کو ہر ہندوستانی کے لیے باعث تحریک قرار دیا ، انہوں نے مزید کہا کہ ملک ان کی خدمات کے لیے  ہمیشہ مقروض رہے گا ۔وزیر اعظم جناب نریندر مودی نے فوجیوں کی ہمت اور قربانیوں کو خراج عقیدت پیش  کیا ۔ انہوں نے کہا کہ ان کی بے لوث لگن اور غیر متزلزل عزم نے ملک کی حفاظت کی ہے  اور افتخار بخشا ہے ۔ انہوں نے اس دن کو ان کی غیر معمولی بہادری اور غیر متزلزل جذبے کے لیے خراج عقیدت  قرار دیا ۔مسلح افواج کی بہادری اور قربانی کو سلام پیش کرتے ہوئے وزیر دفاع جناب راج ناتھ سنگھ نے کہا کہ فوجیوں کی ہمت اور حب الوطنی نے اس بات کو یقینی بنایا کہ ملک محفوظ رہے ۔ انہوں نے کہا کہ ہندوستان ان کی قربانی اور خدمات کو کبھی فراموش نہیں کریگا ۔اس دن کے موقع پر ، وزیر دفاع نے نئی دہلی میں نیشنل وار میموریل پر گلہائے عقیدت نذر کیے اور بہادرسپاہیوں کو خراج عقیدت پیش کیا ۔دفاع کے وزیر مملکت جناب سنجے سیٹھ ، چیف آف ڈیفنس اسٹاف جنرل انیل چوہان ، چیف آف آرمی اسٹاف جنرل اوپیندر دویدی ، چیف آف دی ایئر اسٹاف ایئر چیف مارشل اے پی سنگھ ، دفاعی سکریٹری جناب راجیش کمار سنگھ اور وائس چیف آف دی نیول اسٹاف وائس ایڈمرل کرشنا سوامی ناتھن نے بھی شہید سپاہیوں کو گلہائے عقیدت نذر کیے اور خراج عقیدت پیش کیا ۔