بجلی کٹوتی کے شیڈول پر سختی سے عمل کیا جائے ، غیر اعلانیہ کٹوتی سے گریز کریں

پرنسپل سیکریٹری نے محکمہ بجلی کی ایک اعلیٰ سطحی میٹنگ میں افسران کو ہدایت دی
سرینگر/ پاور ڈیولپمنٹ ڈیپارٹمنٹ (پی ڈی ڈی) کے پرنسپل سکریٹری ایچ راجیش پرساد نے آج یہاں سول سیکرٹریٹ میں مرکز کے زیر انتظام علاقے میں بجلی کی صورتحال کے بارے میں ایک جائزہ میٹنگ کی۔پرنسپل سکریٹری نے پی ڈی ڈی افسران سے کہا کہ "بجلی کی کٹوتی کے شیڈول کی سختی سے تعمیل کو یقینی بنائیں اور اس کے علاوہ غیر طے شدہ کٹوتیوں سے بچیں۔میٹنگ میں کے پی ڈی سی ایل ، جے کے پی ٹی سی ایل کے افسران بشمول محمود احمد شاہ، منیجنگ ڈائریکٹر کے پی ڈی سی ایلانجینئر روحیلہ وانی، منیجنگ ڈائریکٹر جے کے پی ٹی سی ایل ،مختلف ونگز کے چیف انجینئرز، سپرنٹنڈنگ انجینئرز، چیف الیکٹریکل انسپکٹر اورڈویژنز کے ایگزیکٹو انجینئرز موجود تھے۔میٹنگ کے دوران وادی میں بجلی کی موجودہ صورتحال اور موسم سرما کے لیے بفر سٹاک کی دستیابی کے بارے میں ایک مختصر رپورٹ پر تفصیلی تبادلہ خیال کیا گیا۔چیف انجینئر ڈسٹری بیوشن کے پی ڈی سی ایل نے لوڈ کے منظر نامے کی تفصیلات پیش کیں اور آپریشنل لوڈ کرٹیلمنٹ پروگرام ایل سی پی پر غور کیا۔ بتایا گیا کہ گزشتہ سال کے مقابلے میں وادی کو تقریباً 8-10 فیصد اضافی بجلی فراہم کی جا رہی ہے۔ وادی کو اوسطاً 1600 میگاواٹ سپلائی کی جا رہی ہے جس کا زیادہ سے زیادہ بوجھ 1750 میگاواٹ ہے۔پرنسپل سکریٹری نے افسران سے سخت نگرانی کے ساتھ بغیر کسی غیر طے شدہ کٹوتیوں کے لوڈ میں کمی کے شیڈول کے مطابق بجلی فراہم کرنے کو کہا۔ انہوں نے ہر 11kV فیڈر کے AT&C نقصان کی باقاعدہ نگرانی کرنے کو بھی کہا تاکہ نقصان کو پورا کرنے کے لیے اصلاحی اقدام کیا جائے تاکہ پوری وادی میں معیاری اور قابل اعتماد بجلی کی فراہمی ممکن ہو سکے۔ انہوں نے افسران کو مزید ہدایت کی کہ وہ بجلی چوری اور غیر مجاز اضافی لوڈ کے استعمال کے خطرے کو روکنے کے لیے انفورسمنٹ مہم کو تیز کریں۔راجیش پرساد نے کسی بھی ہنگامی صورتحال سے نمٹنے کے لیے KPDCL کے ڈویڑنل اور سینٹرل اسٹور کے ساتھ ٹرانسفارمرز (DTs) اور اضافی مواد کی دستیابی کا بھی جائزہ لیا۔چیف انجینئر ڈسٹری بیوشن نے بتایا کہ کسی بھی بندش کی صورت میں بجلی کی فراہمی کی فوری بحالی کے لیے بفر ڈی ٹی اور فاضل مواد کا وافر ذخیرہ موجود ہے۔