جموں میں پارٹی رہنماؤں کو سید محمد الطاف بخاری کی ہدایات
جموں: اپنی پارٹی کے سربراہ سید محمد الطاف بخاری نے آج پارٹی لیڈروں کو ہدایت دی ہے کہ وہ مجوزہ پنچایتی اور بلدیاتی انتخابات کے لئے تیاریوں میں جھُٹ جائیں اور اپنی عوامی رابطہ مہم میں تیزی لائیں۔
موصولہ بیان کے مطابق گاندھی نگر جموں میں واقع اپنی پارٹی کے آفس میں آج سید محمد الطاف بخاری کی سربراہی میں پارٹی لیڈران کی ایک اہم میٹنگ ہوئی، جس میں جموں کشمیر کے موجودہ سیاسی منظرنامے کا جائزہ لیا گیا اور پارٹی کو زمینی سطح پر مزید مضبوط کرنے کےلئے حکمت عملی طے کی گی۔
اس میٹنگ میں پارٹی رہنماوں نے تنظیمی ڈھانچے کو مزید مضبوط کرنے اور بعض اہم پارٹی امور پر تبادلہ خیالات کیا اور اپنا نقطہ نظر بیان کیا۔ سید محمد الطاف بخاری نے پارٹی لیڈران کو بغور سُنا اور اُنہیں ہدایات دیں کہ وہ اپنی سیاسی سرگرمیوں اور عوامی رابطہ مہم میں سُرعت لائیں۔ انہوں نے پارٹی لیڈران کو اپنے اپنے علاقوں کے عوامی مسائل اُجاگر کرنے کی ہدایات بھی دیں تاکہ انہیں حل کرانے کےلئے ان مسائل کو متعلقہ حکام کی نوٹس میں لایا جائے۔ اس موقعے پر اُنہوں نے پارٹی لیڈران کے جوش وجذبے کو بھی سراہا۔
اس اجلاس میں جو پارٹی لیڈران موجود تھے، اُن میں جنرل سکریٹری وجے بکایا، جنرل سیکرٹری رفیع میر، صوبائی صدر جموں ایس منجیت سنگھ، صوبائی سینئر نائب صدر جموں اور سابق ایم ایل اے فقیر ناتھ، صوبائی نائب صدر جموں اور سابق ایم ایل اے پریم لال، ایڈیشنل جنرل سکریٹری ارون چھبر، ایس ٹی ونگ جموں و کشمیر کے صدر سلیم عالم، ایس سی ونگ کے صدر بودھ راج بھگت، نائب صدر یوتھ ونگ وشال نارانیہ، نائب صدر یوتھ ونگ/ ترجمان/ میڈیا کوآرڈینیٹر رقیق احمد خان، ایس سی ونگ ضلع صدر سامبہ ساحل بھارتی، صوبائی صدر خواتین ونگ جموں پونیت کور، خواتین ونگ کی صوبائی نائب صدر نیلم گپتا، سینئر ضلع نائب صدر جموں ویبھو متو، سینئر رُکن مدن لال ٹھاکر، اور دیگر لیڈران شامل تھے۔
