خطوں کے درمیان پیدا کی گئیں دوریاں کم کرنا وقت کی اہم ضرورت

نو منتخبہ عوامی حکومت لوگوں کو راحت پہنچانے میں کوئی کثر باقی نہیں چھوڑے گی: ڈاکٹر فاروق عبداللہ
سرینگر گذشتہ 10سال کے دوران جموںوکشمیر کے عوام نے سخت ترین مصائب اور مشکلات کا سامنا کیا اور5اگست2019کے فیصلے نہ صرف کشمیر بلکہ جموں کے عوام کیلئے بہت زیادہ نقصاندہ ثابت ہوئے۔بی جے پی نے اس خطہ کو اقتصادی اور معیشی بدحالی کے اندھیروں میں دھکیلنے میں کوئی کثر باقی نہیں چھوڑی لیکن بدقسمتی سے الیکشن سے عین قبل بھاجپا نے مذہب کے نام پر گندی سیاست شروع کی اور وہ یہاں کے عوام بہت حد تک گمراہ کرنے میں کامیاب رہے۔ ان باتوں کا اظہار صدرِ نیشنل کانفرنس ڈاکٹر فاروق عبداللہ نے جموں میں اپنے3روزہ قیام کے دوران تمام خطوں سے آئے ہوئے عوامی وفود، معزز شہریوں، پارٹی لیڈران، عہدیداران اور کارکنان سے ملاقات کے دوران تبالہ خیالات کرتے ہوئے کیا۔ ڈاکٹر فاروق عبداللہ نے کہا کہ عوام کے بنیادی اور اہم نوعیت کے مسائل و مشکلات کا سدباب کرنا نومنتخبہ عوام کی اولین ترجیح ہے لیکن یہاں کے لوگوں کے درمیان جو دوریاں بڑھانے کی مذموم کوششیں کی گئی ہیں اُن کو ناکام بنانا وقت کی اہم ضرورت ہے ۔ ریاست کے اندر خطوں کے درمیان جو دوریوں کو کم کرنے کیلئے دربار مو کی بحالی جیسے ٹھوس اور کارگر اقدامات کی ضرورت ہے تاکہ لوگ ماضی کی طرح آپس میں ملیں اور ایک ساتھ زندگی بسر کرنے لگیں۔ انہوں نے کہاکہ گذشتہ10سال کے دوران ریاستی عوام کو جو مصائب اور مشکلات جھیلنے پڑے ، جموں کی آبادی سے اُس سے بچ نہیں پائی۔ یہاں بھی کمر توڑ مہنگائی ، اقتصادی بدحالی اور ریکارڈ توڑ بے روزگاری سے لوگ پریشانِ حال ہیں۔ نوجوان پود کو مایوسی کے بھنور میں دھکیلاگیاہے، وہ ذہنی پریشانیوں میں مبتلا ہیں اور منشیاتی جیسی لعنت میں گر گئے ہیں۔ ڈاکٹر فاروق عبداللہ نے کہا کہ حکومت کے سامنے بہت سارے چیلنج ہے اور مجھے اُمید ہے کہ حکومت عوام کو راحت پہنچانے میں کامیاب ہوگی۔ انہوں نے کہا کہ بجلی کے نظام معقولیت اور فیس میں کمی ،پینے کے پانی کی سپلائی بہتر بنانے اور راشن کوٹا میں اضافہ جیسے وعدوں پر نیشنل کانفرنس حکومت قائم ہے اور حکومت منشور میں کئے گئے تمام وعدوں کو ایک ایک کرکے پورا کریگی۔ اس دوران ملاقی ہونے والوں نے ڈاکٹر فاروق عبداللہ کو اسمبلی الیکشن میں جیت پر مبارکباد پیش کی۔ انہوں نے لوگوں کو شکریہ ادا کیا اور کہا کہ یہ جیت اصل میں عوام کی جیت ہے، جنہو ں نے اپنی اس آبائی جماعت کو ماضی کی طرح بے پناہ محبت، تعاون اور اشتراک دیکر سرخرو کیا۔ ڈاکٹر فاروق عبداللہ نے اُمید ظاہرکی کہ نو منتخب ممبران اسمبلی اور حکومت ہر سطح پر لوگو ںکی راحت رسانی اور اُن کے مشکلات حل کرنے میں دن رات لگن اور محنت کیساتھ کام کرتے رہیں گے ۔اس موقعے پر پارٹی کے معاون جنرل سکریٹری اجے کمار سدھوترا اور صوبائی صدر ایڈوکیٹ رتن لعل گپتا دیگر عہدیداران بھی موجود تھے۔