دربار مو کو بحال کیا جائے یا سرینگر کو مستقل دارلخلافہ قرار دیا جائے:انجینئر رشید کا مطالبہ

عوامی اتحاد پارٹی کے سربراہ اور رکن پارلیمان انجینئررشید نے جمعہ کی صبح دربار مو کی روایت کی بحالی کے مطالبے کو لے کر یہاں سول سیکریٹریٹ سرینگر کے باہر پر امن احتجاجی مظاہرہ کیا۔انہوں نے اس موقع پر میڈیا کے ساتھ بات کرتے ہوئے کہاکہ جموں وکشمیر میں ہر سال دربار منتقل ہوا کرتا تھا موسم سرما میں ہمارا دارالخلافہ جموں جبکہ موسم گرما سرینگر ہوا کرتا تھا۔ ’لیکن گذشتہ کچھ برسوں سے ہمارا دارلخلافہ جموں ہے نہ سرینگرہے‘۔ممبر پارلیمنٹ انجینئر رشید نے کہاکہ ہم اس احتجاج کی وساطت سے عمر عبداللہ کو یاد دلانا چاہتے ہیں کہ انہوں نے وعدہ کیا تھا کہ سرکار بنتے ہی دربار مو کی روایت کا بحال کیا جائے گا‘۔انہوں نے کہاہمارا مطالبہ ہے کہ لوگوں کو بتایا جائے کہ ان کا دارلخلافہ کہاں ہے لوگ پریشان ہیں کہ ان کی فائیلیں جموں میں ہیں یا سرینگر میں ہیں‘۔انہوںنے مطالبہ کیا کہ ’یا تو دربار کی منتقلی کی روایت کو بحال کیا جائے یا سری نگر کو جموں وکشمیر کا مستقل دارلخلافہ قرار دیا جائے بلکہ سب سے بہتر طریقہ یہی ہے کہ سری نگر کو ہی مستقل دارلخلافہ بنایا جائے‘۔انہوں نے کہ وزیر اعلیٰ ’عمر عبداللہ کا طریقہ غلط ہے وہ وعدے کرتے ہیں لیکن بعد میں پلٹ جاتے ہیں‘۔