پونچھ کے مینڈھر علاقے میں جے سی او سمیت دو فوجی اہلکاروں کی ہلاکت کے بعد تیسرے روز بھی سیکورٹی فورسز اور جنگجوﺅں کے مابین مسلح جھڑپ جاری رہی ۔ جھڑپ کے چلتے مسلسل تیسرے روز بھی جموں ، راجوری اور پونچھ شاہراہ پر ٹریفک کی آمد رفت معطل رہی جس کے نتیجے میں شاہراہ کے مختلف مقامات پر درجنوں گاڑیاں درماند ہو کر رہ گئی اور مسافروں کو پریشانیوں کا سامنا کرنا پڑا ۔ جموں سے نمائندے نے تفصیلات فراہم کرتے ہوئے بتایا کہ پونچھ کے مینڈھر علاقے میں گزشتہ دنوں مختصر جھڑپ میں فوجی آفیسر سمیت دو فوجیوں کی ہلاکت کے بعد تیسرے روز بھی سیکورٹی فورسز اور جنگجوﺅں کے مابین جھڑپ جاری رہی ۔ پولیس کے ایک سنیئر آفیسر نے اس کی تصدیق کرتے ہوئے بتایا کہ مسلح جھڑپ میں جمعرات کو دو فوجی اہلکاروں کی ہلاکت کے بعد علاقے میں خاموشی چھا گئی تاہم بعد میں جمعہ کو ایک مرتبہ پھر تلاشی آپریشن کے دوران جنگجوﺅں اور سیکورٹی فورسز کے درمیان دوبارہ جھڑپ شروع ہوئی اور تب سے علاقے میں دو بددو جھڑپ جاری ہے ۔ ادھر فائرنگ کے ساتھ ہی پونچھ جموں اور راجوری شاہراہ پر تیسرے روز بھی ٹریفک کی آمد رفت معطل رہی جس دوران مختلف مقامات پر سینکڑوں کی تعداد میں گاڑیاں درماندہ ہو کر رہ گئی ہے ۔