’بھارت جوڑو یاترا‘ کی پہلی سالگرہ

کانگریس میں جوش خروش، پارٹی پورے ملک میں 722 پدیاترائیں منعقد کرے گی
نئی دہلی/کانگریس نے کہا کہ ‘بھارت جوڑو یاترا’ نے پارٹی کارکنوں میں زبردست جوش و خروش پیدا کیا ہے اور اس یاترا کی پہلی سالگرہ کے موقع پر پارٹی 7 ستمبر کو پورے ملک میں ضلعی سطح پر 722 پد یاترا منعقد کرے گی۔ جس میں تمام بڑے لیڈران شرکت کریں گے ۔ کانگریس کے جنرل سکریٹری تنظیم کے سی وینوگوپال نے پیر کو یہاں پارٹی ہیڈکوارٹر میں ایک پریس کانفرنس میں کہا کہ گزشتہ سال 7 ستمبر کو پارٹی لیڈر راہل گاندھی نے کنیا کماری سے کشمیر تک تاریخی ‘بھارت جوڑو یاترا’ کا آغاز کیا تھا۔ یہ ملک میں اب تک کسی بھی سیاست دان کی جانب سے کی جانے والی سب سے طویل پد یاترا ہے ۔مسٹر گاندھی کی 4081 کلومیٹر طویل یاترا 136 دنوں تک جاری رہی اور 12 ریاستوں، دو مرکز کے زیر انتظام علاقوں، 75 اضلاع اور 76 لوک سبھا حلقوں سے ہوتی ہوئی جموں و کشمیر کے دارالحکومت سری نگر پہنچی تھی۔ انہوں نے کہا کہ ‘بھارت جوڑو یاترا’ میں مسٹر گاندھی نے وسیع پیمانے پر عوامی رابطہ کیا۔ اس دوران بے شمار لوگوں نے ان سے ملاقات کی اور اپنے مسائل بتائے ۔ کانگریس کے لیڈر نے یاترا کے دوران بچوں سے لے کر خواتین اور بزرگوں سے بات چیت کی اور لوگوں کے مختلف طبقات کے مسائل سنے ۔ انہوں نے کہا کہ اس یاترا کے دوران کانگریس کے سابق صدر نے سو سے زیادہ تنظیموں اور گروپوں کے لوگوں سے بات چیت کی۔ اس دوران 100 سے زیادہ جلسے ہوئے اور انہوں نے 13 بڑے جلسوں سے خطاب کیا۔ عوامی ملاقاتیں اور 12 پریس کانفرنسوں کے ساتھ ساتھ پورے ملک میں لاتعداد ملاقاتیں اس یاترا کا حصہ تھیں۔ مسٹر وینوگوپال نے کہا، “بھارت جوڑو یاترا کی پہلی سالگرہ پر ہم پورے ملک میں 722 ‘بھارت جوڑو’ یاترائیں شروع کر رہے ہیں۔ یہ پدیاترا 7 ستمبر کو شام 5 بجے سے 6 بجے تک ملک کے ہر ضلع میں کانگریس کے سینئر لیڈروں کی قیادت میں منعقد کی جائے گی۔ یاترا کے بعد ملاقاتیں ہوں گی۔کانگریس کے لیڈر نے کہا، "حال ہی میں تشکیل دی گئی کانگریس کی سب سے اعلیٰ پالیسی ساز باڈی کانگریس ورکنگ کمیٹی کی میٹنگ 16 ستمبر کو تلنگانہ کے حیدرآباد میں ہو رہی ہے ۔ اجلاس میں تلنگانہ کے لیے ‘پانچ گارنٹی’ اسکیموں کا اعلان کیا جائے گا۔ پارٹی صدر ملک ارجن کھڑگے کے مطابق نئی تشکیل شدہ ورکنگ کمیٹی کی پہلی میٹنگ 17 ستمبر کو ہوگی اور پھر اس کی توسیعی میٹنگ 18 ستمبر کو ہوگی۔ تمام سی ڈبلیو سی ممبران، پی سی سی صدر،سی ایل پی لیڈران اور پارلیمانی پارٹیوں کے عہدیداران بھی شرکت کریں گے ۔ مسٹر کھڑگے سی ڈبلیو سی کے ارکان، پی سی سی صدور اور سی ایل پی قائدین کے ایک قافلے کو بھی جھنڈی دکھائیں گے جو تلنگانہ کے 119 اسمبلی حلقوں میں سے ہر ایک کا دورہ کرے گا۔ اس کے بعد 18 ستمبر کو کانگریس کارکنان اپنے اپنے حلقوں میں بی آر ایس حکومت کے خلاف ڈور ٹو ڈور مہم چلائیں گے