مودی حکومت کے نو سالوں میں روزگار میں اضافہ ہوا۔ ڈاکٹر جتیندر سنگھ

 نئی دلی/مرکزی وزیر مملکت ڈاکٹر  جتیندر سنگھ نے پیر کو کہا کہ مودی حکومت کے گزشتہ نو سالوں میں روزگار میں اضافہ ہوا ہے، جس کے دوران ملک کے نوجوانوں کو نو لاکھ نوکریاں دی گئیں۔یہاں روزگار میلہ سے خطاب کرتے ہوئے انہوں نے کہا کہ وزیر اعظم نریندر مودی کے دور اقتدار کی سب سے بڑی کامیابی یہ تھی کہ بڑی تعداد میں سرکاری ملازمتیں فراہم کی گئیں۔  ڈاکٹر جتیندرسنگھ نے  پی ایم  مودی کی صدارت میں منعقدہ تقریب سے خطاب کرتے ہوئے کہا، ”نہ صرف ملازمتیں پیدا ہوئی ہیں، بلکہ آپ (وزیراعظم) نے نوجوانوں میں یہ بیداری پیدا کی ہے کہ روزگار صرف (سرکاری ملازمتوں کے بارے میں( نہیں ہے۔ ”انہوں نے کانگریس کی زیر قیادت متحدہ ترقی پسند اتحاد (یو پی اے( اور بی جے پی کے قومی جمہوری اتحاد (این ڈی اے) حکومت کے درمیان روزگار پیدا کرنے کا حوالہ دیتے ہوئے کہا، ”بعض اوقات، سوالات اٹھائے جاتے ہیں کہ اس وقت اور اب میں کیا فرق ہے۔ ڈاکٹر جتیندر سنگھ نے کہا کہ یو پی اے کے پہلے نو سالوں میں – یعنی 2004 سے 2013 تک – چھ لاکھ نوکریاں دی گئی تھیں، جب کہ مودی حکومت کے تحت نو لاکھ نوکریاں فراہم کی گئی ہیں، جس میں 60 سے 70 فیصد کا اضافہ ہوا ہے۔انہوں نے حکومت ہند کی تین اہم بھرتی ایجنسیوں – اسٹاف سلیکشن کمیشن ، ریلوے ریکروٹمنٹ بورڈ  اور یونین پبلک سروس کمیشن کی یو پی اے اور این ڈی اےحکومت کے دوران کی گئی بھرتیوں کا موازنہ کیا۔انہوں نے کہا کہ یو پی اے کے نو سالہ دور حکومت میں ایس ایس سی نے دو لاکھ لوگوں کو بھرتی کیا تھا، جب کہ این ڈی اے کے دور حکومت میں اس نے چار لاکھ سے زیادہ لوگوں کو بھرتی کیا تھا۔اسی طرح، یو پی اے کے دور حکومت میں آر آر بی کے ذریعہ 3,47,291 بھرتیوں کے مقابلے، این ڈی اے کے دور حکومت میں 4.2 لاکھ سے زیادہ بھرتیاں کی گئیں۔ ڈاکٹر جتیندر سنگھ نے کہا کہ یو پی ایس سی نے یو پی اے کے دور میں 45,431 نوجوانوں کی بھرتی کی جبکہ مودی حکومت کے نو سالوں کے دوران 50,906 کو بھرتی کیا گیا۔اتنا ہی نہیں ڈاکٹر  سنگھ نے کہا کہ مرکزی حکومت نے سرکاری ملازمین کو بڑے پیمانے پر ترقیاں بھی دی ہیں۔مثال کے طور پر، یو پی اے کے دورِ حکومت میں، مرکزی سیکرٹریٹ سروس (سی ایس ایس)افسران کے لیے یو پی اے کے نو سالوں میں جوائنٹ سکریٹری سطح پر 40 ترقیاں دی گئیں۔ جبکہ آپ (مودی )قیادت میں اس طرح کی 107 ترقیاں دی گئی ہیں۔اسی طرح، ڈائریکٹر کی سطح پر یو پی اے کے دور میں 349 پروموشنز کے مقابلے میں، پی ایم مودی کی قیادت میں 791 ایسی ترقیاں دی گئی ہیں ۔ان تمام پروموشنز نے ملازمتوں کے حصول کے امکانات کو مزید کھول دیا ہے۔ یہ حکومت کے بدعنوانی کے خلاف صفر رواداری کے مسلسل نقطہ نظر کی وجہ سے ممکن ہوا ہے جس نے سرکاری ملازمین کو کارکردگی دکھانے کے لیے سازگار ماحول بنایا ہے۔