ہندوستان نے ایک نئی تاریخ رقم کر دی41دن بعد چندریان 3کی کامیاب لینڈنگ ، وزیر اعظم نے دی قوم کو مبارکباد

لیفٹیننٹ گورنر سمیت جموں کشمیر کے متعدد لیڈران نے سائنسدانوں کی کوششوں کو سراہا
سرینگر/
ہندوستان نے 23 اگست کو ایک نئی تاریخ رقم کر دی،چندریان3 نے چاند کی سطح پر کامیابی کے ساتھ سافٹ لینڈنگ کی اور اس کے ساتھ ہی ہندوستان دنیا کا پہلا ملک بن گیا ہے جس نے چاند کے جنوبی قطب پر رسائی حاصل کی ہے۔اسرو کا چندریان 3 آج چاند کے جنوبی قطب پر اترگیا۔ امریکہ کے اپولو مشن سمیت دیگر ممالک کے مشن کو چاند کے وسط پر، جبکہ چین کا مشن قطب شمالی پر اتارا گیا تھا۔14 جولائی کو چندریان 3 کو آندھرا پردیش کے سری ہری کوٹا میں ستیش دھون خلائی مرکز سے لانچ کیا گیا تھا اور اب بدھ کی شام 6بج کر 4منٹ پر اس نے چاند پر کامیاب لینڈنگ کی چندریان زمین پر 14 دن یعنی چاند کا ایک دن رہ کر چاند پر مطالعہ کرے گا۔واضح رہے کہ چندریان -3 کو چندریان -2 کی ناکامی کے چار سال بعد 2019 میں لانچ کیا گیا تھا۔ پچھلے مشن کی ناکامیوں کو ذہن میں رکھتے ہوئے اس میں خصوصی تبدیلیاں کی گئیں اور آج اسرو نے پورے اعتماد کے ساتھ اپنی کامیاب لینڈنگ کی بات کہی ہے۔ پہلی بار کوئی ملک چاند کے قطب جنوبی پر خلائی جہاز اتارسکا ہے۔ جس کی وجہ سے دنیا بھر کے سائنسدان ہندوستان کے مشن مون پر نظریں جمائے ہوئے تھے۔چندریان 3 کے تین بڑے حصے ہیں، پہلا پروپلشن ماڈیول، دوسرا لینڈر ماڈیول وکرم اور تیسرا روور پرگیان۔ 17 اگست کو پروپلشن ماڈیول سے الگ ہونے کے بعد، لینڈر ماڈیول وکرم اپنی گود میں بیٹھے روور پرگیان کے ساتھ چاند کی طرف بڑھا۔ روور پرگیان چاند کے گرد گھومے گا، نمونے جمع کرے گا اور سائنسی ٹیسٹ کرے گا۔ادھر وزیر اعظم نریندر مودی نے وکرم لینڈر کی کامیاب لینڈنگ کے بعد جنوبی افریقہ کے شہر جوہانسبرگ سے ورچوئل انداز میں ہندوستانی عوام کو خطاب کیا اور کہا کہ یہ ملک کے لیے انتہائی فخر کا لمحہ ہے۔ادھر ملک کی مختلف شخصیات اور سیاسی ، سماجی تنظیموں نے بھی اس تواریخی موقعے پر خوشی کااظہار کرتے ہوئے اس کو ایک تاریخی لمحہ قرار دیا ہے ۔ ادھر جموں کشمیر کے سابق وزرائے اعلیٰ ڈاکٹر فاروق عبداللہ اور عمر عبداللہ نے بھی چندریا ن کی کامیاب لینڈنگ پر خوشی کااظہار کرتے ہوئے کہا ہے کہ یہ ملک کے سبھی شہریوں کےلئے خوشی کا مقام ہے ۔ تفصیلات کے مطابق ہندوستان نے 23 اگست کو ایک نئی تاریخ رقم کر دی۔ چندریان-3 نے چاند کی سطح پر کامیابی کے ساتھ سافٹ لینڈنگ کی اور اس کے ساتھ ہی ہندوستان دنیا کا پہلا ملک بن گیا ہے جس نے چاند کے جنوبی قطب پر رسائی حاصل کی ہے۔ وکرم لینڈر جب چاند کی سطح کی طرف بڑھ رہا تھا تو اس لمحہ کا گواہ پورا ہندوستان تو بنا ہی، وزیر اعظم نریندر مودی نے بھی جنوبی افریقہ سے براہ راست نشریہ دیکھا اور ہندوستان کی کامیابی پر ترنگا لہرا کر خوشی کا اظہار کیا۔وزیر اعظم نریندر مودی نے وکرم لینڈر کی کامیاب لینڈنگ کے بعد جنوبی افریقہ کے شہر جوہانسبرگ سے ورچوئل انداز میں ہندوستانی عوام کو خطاب کیا اور کہا کہ یہ ملک کے لیے انتہائی فخر کا لمحہ ہے۔ انھوں نے اپنے خطاب میں کہا کہ "زندگی خوشیوں سے بھر گئی ہے۔ یہ لمحہ فتح کی راہ پر آگے بڑھنے کا ہے۔ یہ لمحہ 140 کروڑ دھڑکنوں کے لیے ہے، آج ہر گھر میں جشن شروع ہو گیا ہے۔ میں چندریان-3 کی ٹیم، اِسرو اور ملک کے سبھی سائنسدانوں کو مبارکباد دیتا ہوں۔” پی ایم مودی نے چندریان-3 کی کامیابی پر سائنسدانوں کا خاص طور سے تذکرہ کیا اور کہا کہ ان کی محنت سے ہی ہم چاند کے اس جنوبی قطب پر پہنچ گئے جہاں پر آج تک کوئی نہیں پہنچ پایا ہے۔ آج سبھی متھک بدل جائیں گے۔ انھوں نے کہا کہ کبھی کہا جاتا تھا چندا ماما بہت دور کے ہیں، اب ایک دن وہ بھی آئے گا جب بچے کہا کریں گے چندا ماما بس ایک ٹور (سیاحت) کے ہیں۔قابل ذکر ہے کہ ہندوستان نے چندریان-3 کی کامیاب سافٹ لینڈنگ کے ساتھ ان ممالک کی فہرست میں بھی اپنا نام شامل کر لیا ہے جنھوں نے چاند پر سافٹ لینڈنگ کے ذریعہ رسائی حاصل کی ہے۔ چاند کی سطح پر ہندوستان سے پہلے چین، امریکہ اور سوویت یونین نے سافٹ لینڈنگ میں کامیابی حاصل کی تھی۔ بہرحال، خبر رساں ایجنسی نے اِسرو کے افسران کے حوالے سے بتایا ہے کہ سافٹ لینڈنگ کے بعد اب رووَر اپنے ایک سائیڈ پینل کا استعمال کر کے لینڈر کے اندر سے چاند کی سطح پر اترے گا، جو ریپ کی شکل میں کام کرے گا۔ یہ بھی بتایا جا رہا ہے کہ لینڈنگ کے بعد لینڈر کو اس میں موجود انجنوں کے چاند کی سطح کے قریب سرگرم ہونے کے سبب دھول کے چیلنجز کا سامنا کرنا پڑ سکتا ہے۔چندریان کی کامیاب لیڈنگ پر جموں کشمیر کے لیفٹیننٹ گورنر منوج سنہا نے سائنسی دانوں کو مبارکبادی دیتے ہوئے کہا ہے کہ یہ بھارت کی اب تک کی سب سے بڑی خلائی مشن کی کامیابی ہے ۔ دریں اثناءچندریان کی کامیاب لینڈنگ پر وزیر داخلہ امت شاہ ، وزیر دفاع راجناتھ سنگھ اور وزیر خارجہ ، وزیر خزانہ اور دیگر وزارءنے بھی خوشی کااظہار کرتے ہوئے اس کو ملک کےلئے ایک کامیابی قراردیتے ہوئے کہا ہے کہ یہ عظیم خواب آج پورا ہوا ہے ۔ ادھر جموں کشمیر کے سابق وزرائے اعلیٰ ڈاکٹر فاروق عبداللہ ، عمر عبداللہ نے بھی چندریان مشن کی کامیابی پر خوشی کااظہار کرتے ہوئے اس کو ملک کےلئے ایک تاریخی لمحہ قراردیا ہے ۔