چیف سیکرٹری نے سری نگر میں ترنگا ریلی کو جھنڈی دکھا کر روانہ کیا

لالچوک میں سمارٹ سٹی پروجیکٹ پر جاری کام کا جائزہ لیا
سرینگر/ جموں وکشمیر کے چیف سکریٹری ارن کمار مہتا کا کہنا ہے کہ سری نگر ملک کے خوبصورت ترین شہروں میں سے ایک شہر بنے گا۔انہوں نے کہا کہ سمارٹ سٹی پروجیکٹ کے تحت بہت سارے کام مکمل ہوئے ہیں او باقی کام بھی مکمل ہو رہے ہیں۔موصوف چیف سکریٹری نے ان باتوں کا اظہار منگل کو یہاں نامہ نگاروں کے سوالوں کے جواب دینے کے دوران کیا۔سمارٹ سٹی پروجیکٹ کے تحت جاری کاموں کے متعلق پوچھے جانے پر انہوں نے کہا: ‘اس پروجیکٹ کے بہت سارے کام مکمل ہوئے ہیں، جی ٹونٹی سر براہی اجلاس سے پہلے ہی کئی کام مکمل ہوئے ہیں۔ان کا کہنا تھا: ‘لالچوک جس کو سری نگر سکوائر یا سری نگر پلازہ کا نام بھی دیتے ہیں، کا کام ، گھنٹہ گھر اور جھیل ڈل کے کنارے پر سائیکل ٹریک بھی یوم آزادی سے پہلے ہی مکمل ہوں گے۔انہوں نے کہا کہ سری نگر ملک کے سب سے خوبصورت شہروں میں سے ایک شہر بن جائے گا۔دریں اثناءچیف سکریٹری ڈاکٹر ارون کمار مہتا نے آج یہاں بخشی اسٹیڈیم میں ”میری ماں میرا دیش“ مہم کے تحت 77ویں یوم آزادی کی تقریبات کے آغاز کے طور پر ایک میگا ترنگا ریلی کو جھنڈی دکھا کر روانہ کیا۔اس موقع پر ڈویژنل کمشنر کشمیر وجے کمار بدھوری، ڈپٹی کمشنر سرینگر محمد اعجاز اسد بھی موجود تھے۔اس میگا ریلی کا انعقاد ضلعی انتظامیہ سرینگر نے محکمہ یوتھ سروسز اینڈ اسپورٹس کے اشتراک سے کیا تھا جس میں سری نگر کے مختلف تعلیمی اداروں کے ایک ہزار سے زائد اسکولی طلباءنے شرکت کی۔اس تقریب کے دوران خطاب کرتے ہوئے چیف سکریٹری نے کہا کہ اس طرح کی تقریبات اس موقع کے لیے موزوں ہیں۔ انہوں نے کہا کہ یہ سرگرمیاں نوجوان نسلوں میں قوم کے بارے میں حقیقی جذبہ حب الوطنی کو ابھاریں گی۔انہوں نے مزید کہا کہ اس طرح کی سرگرمیاں ہمیں اپنی کھوئی ہوئی عظمت کو دوبارہ حاصل کرنے کا پیش خیمہ ہونے کے ساتھ ساتھ ’وکسٹ جموں و کشمیر‘ کے اہداف کو حاصل کرنے کے لیے ضروری رفتار بھی فراہم کرنے والی ہیں۔ انہوں نے مشاہدہ کیا کہ ہندوستان بحیثیت قوم ایک اقتصادی اور ثقافتی سپر پاور ہے جسے وہ پہلے اپنے لوگوں کی سوچ کو تبدیل کرکے دوبارہ حاصل کرنے کے راستے پر ہے۔ریلی بخشی اسٹیڈیم کے احاطے سے شروع ہوئی اور لل دید اسپتال، لال منڈی، وزیر باغ سے ہوتی ہوئی ڈائریکٹوریٹ آف یوتھ سروسز اینڈ اسپورٹس سرینگر کشمیر کے احاطے میں اختتام پذیر ہوئی۔بعد ازاں چیف سکریٹری نے لال چوک کا بھی دورہ کیا اور اسمارٹ سٹی مشن کے تحت شروع کئے گئے پروجیکٹوں کا جائزہ لیا۔ انہوں نے کہا کہ ان منصوبوں کی تکمیل سے اس شہر کی خوبصورتی اور حسن میں اضافہ ہو گا۔انہوں نے کہا کہ ریور فرنٹ کی مشرقی سمت اور فارشور روڈ کے ساتھ سائیکل ٹریک کے ساتھ ساتھ شہر یوم آزادی سے پہلے ایک مختلف شہر میں نظر آئے گا۔ انہوں نے کہا کہ جب یہ منصوبے عوام کے لیے وقف ہو جائیں گے تو شہر کے لوگوں کو پسند کرنے کا ایک مختلف تجربہ ہوگا۔