جی 20اجلاس ،مرکزی حکومت کشمیر میں منعقد ہونے والی تقریب کی شاندار کامیابی کیلئے برابر کوشاں

نئی دہلی کا ایل جی انتظامیہ سے مسلسل را بطہ ،منوج سنہا کی افسروں اور ملازمین کو ہدایت کہا تقریب کی کامیابی اولین ترجیح
سرینگر/حکومت ہند نے اس بات کا پختہ عزم کیا ہے کہ کشمیر میں منعقد ہونے والے جی 20اجلاس کو ہر صورت میں کامیاب بنانے کی کوشش کی جاے گی تاکہ اس مقصد کو حاصل کیا جاسکے جس کے لئے اسے جموں کشمیر میں منعقد کرنے کا فیصلہ کیا گیا ہے ۔نئی دہلی میں میڈیا حلقوں نے سرکاری ذرایع کا حوالہ دیتے ہوے کہا کہ کشمیر میں 22مئی سے 24مئی تک منعقد ہونے والے جی 20اجلاس کے ٹورسٹ ورکنگ گروپ کا اجلاس نہ صرف جموں کشمیر بلکہ پورے بھارت کے لئے انتہائی اہمیت کا حامل ہے کیونکہ بھارت نے اسے نئی تھیم یعنی نئے موضوع ”ایک زمین ،ایک خاندان اور ایک مستقبل “کے تحت اسے ایک منفرد اجلاس بنانے کا عزم کیا ہوا ہے تاکہ جی 20گروپ کا قیام جس مدعا و مقصد کیلئے عمل میں لایا گیا اسے ہر صورت میں حاصل کیا جاسکے ۔بتایا جاتا ہے کہ مرکزی حکومت اس اجلاس کے کامیاب انعقاد کیلئے جموں کشمیر انتظامیہ کے ساتھ برابر رابطے میں ہے اور مرکز کو اس اجلاس کے انعقاد کے بارے میں مسلسل اطلاعات فراہم کی جارہی ہیں۔یہ امر قابل ذکر ہے کہ حکومت ہند نے اس کے کامیاب انعقاد کیلئے ایک الگ سے شعبہ قایم کیا ہے جس میں شامل افسر ایل جی انتظامیہ کے ساتھ صلاح مشورے کررہے ہیں ۔ادھر لیفٹننٹ گورنر نے بھی انتظامیہ کے افسروں کو اس بات کی ہدایت دی ہے کہ وہ موجودہ حالات میں جبکہ پوری دنیا کی نظریں جی 20اجلاس پر ٹکی ہوئی ہیں وہ کسی بھی صورت میں کوئی کوتاہی یا غفلت شعاری کا مظاہرہ نہ کریں اور اپنے ماتحت عملے کو بھی چاک و چوبند رکھیں۔ایس کے آئی سی سی اور آس پاس کے علاقوں بشمول جھیل ڈل کو دلہن کی طرح سجایا جارہا ہے اور یہاں لوگ بھی اس کے انعقاد کا انتطار کررہے ہیں لوگوں میں اس حوالے سے غیر معمولی جو ش وخروش پایا جارہا ہے ۔اس بات کا امکان ہے کہ غیر ملکی اور ملکی مندوبین جھیل ڈل کے ساتھ ساتھ مغل باغات کی سیر کرینگے جبکہ ان کے گلمرگ اور پہلگام جانے کا بھی امکان ہے ۔