راجوری میں سڑک کے ایک حادثے میں دو بھائیوں سمیت تین افراد لقمہ اجل بن چکے ہیں جبکہ اس حادثے میں مزید چار افراد زخمی ہوئے ۔اطلاعات کے مطابق ضلع راجوری میں لائن آف کنٹرول کے قریب کل رات دیر گئے پیش آئے سڑک حادثے میں کم از کم تین افراد جاں بحق ہوئے جبکہ چار دیگر زخمی ہوئے۔ ایک عہدیدار نے بتایا کہ یہ حادثہ کل رات تقریبا ساڑھے گیارہ بجے اس وقت پیش آیا جب ایک گاڑی ، جو لام سے ٹھنڈی کاسی پی بی سڑک پر جا رہی تھی ، سڑک سے پھسل کر گہری کھائی میں جا گری۔ انہوں نے بتایا کہ حادثے میں تین مسافر اپنی جان سے ہاتھ دھو بیٹھے جن میں دو بھائی محمد اویس اور محمد افطار ، ذاکر احمد کے بیٹے اور محمد ممتاز ولد محمد صدیق شامل ہیں۔ چار زخمیوں کی شناخت محمد سجاد ، صادق احمد ، ظہیر احمد اور آفتاب احمد کے طور پر ہوئی ہے۔ عہدیدار نے بتایا کہ تھانہ نوشہرہ نے معاملے کا نوٹس لیا ہے۔