موسمیاتی تبدیلی کے خلاف ہندوستان کی لڑائی پوری دنیا کو متحد کرے گی۔ اوم برلا

 نئی دلی/ لوک سبھا کے اسپیکر اوم برلا نے منگل کو ڈنمارک کے پارلیمانی وفد کو بتایا کہ موسمیاتی تبدیلی کے خلاف ہندوستان کی لڑائی پوری دنیا کو متحد کر دے گی۔برلا نے یہ بھی کہا کہ انہیں امید ہے کہ مستقبل قریب میں مجوزہ ”P20” سربراہی اجلاس میں پارلیمانی حکمرانی اور جمہوری اقدار کی مطابقت پر بامقصد بات چیت ہوگی اور پوری دنیا کو فائدہ پہنچے گا۔ڈنمارک کی پارلیمانی کمیٹی برائے یورپی امور کے ارکان نے، اس کے چیئرمین نیلز فلیمنگ ہینسن کی قیادت میں، پارلیمنٹ ہاؤس میں اسپیکر سے ملاقات کی۔وفد کے ارکان کے ساتھ بات چیت کرتے ہوئے، برلا نے ہندوستان اور ڈنمارک کے درمیان باقاعدہ پارلیمانی تبادلوں پر زور دیا۔ انہوں نے تجویز پیش کی کہ دونوں ممالک کے درمیان بات چیت کا ایک باقاعدہ عمل تیار کیا جانا چاہیے تاکہ اس بات کو یقینی بنایا جا سکے کہ دونوں پارلیمنٹ ایک دوسرے سے سیکھ سکیں اور بہترین طریقوں کا اشتراک کر سکیں۔لوک سبھا سکریٹریٹ کی طرف سے جاری کردہ ایک بیان کے مطابق، برلا نے ستمبر 2020 میں ہندوستان اور ڈنمارک کے درمیان گرین اسٹریٹجک پارٹنرشپ کا حوالہ دیا، جس پر دونوں ممالک کے درمیان ہم آہنگی میں بہتری آئی ہے۔اسپیکر نے وفد کو بتایا کہ ہندوستان نے ’’ایک زمین، ایک خاندان، ایک مستقبل‘‘ کے نعرے کے ساتھ جی 20 کی صدارت سنبھالی ہے اور موسمیاتی تبدیلی کے خلاف اس کی لڑائی پوری دنیا کو ایک خاندان کے طور پر متحد کرے گی۔انہوں نے امید ظاہر کی کہ جمہوری اقدار کے تئیں ڈنمارک اور ہندوستان کی وابستگی بین الاقوامی فورمز پر مضبوط شراکت داری کا باعث بنے گی۔برلا نے کہا کہ ہندوستان مستقبل قریب میں G20 سربراہی اجلاس کے موقع پر P20 سربراہی اجلاس کا بھی اہتمام کرے گا، جس میں G20 ممالک کے علاوہ دیگر مدعو ممالک کی پارلیمانوں کے پریزائیڈنگ افسران بھی شرکت کریں گے۔