کانگریس لیڈر سپریہ شرینیت نے کہا ’’آج اسمرتی ایرانی نے انتہائی گھٹیا بیان دیا ہے۔ ان کا بیان سننے کے بعد میں یہ کہہ سکتی ہوں کہ ان کے الفاظ تو نریندر مودی کے ہیں اور کلچر آر ایس ایس کا ہے۔‘‘
نئی دہلی: لوک سبھا کی رکن پارلیمنٹ اور بی جے پی لیڈر اسمرتی ایرانی کی طرف سے کانگریس لیڈر راہل گاندھی پر کئی طرح کے الزامات عائد کئے جانے کے بعد کانگریس پارٹی کی قومی ترجمان سپریہ شرینیت نے ان پر جوابی حملہ بولا۔ انہوں نے کہا ہے کہ اسمرتی ایرانی نے انتہائی گھٹیا بیان دیا ہے۔
کانگریس لیڈر سپریہ شرینیت نے کہا ’’آج اسمرتی ایرانی نے انتہائی گھٹیا بیان دیا ہے۔ ان کا بیان سننے کے بعد میں یہ کہہ سکتی ہوں کہ ان کے الفاظ تو نریندر مودی کے ہیں اور کلچر آر ایس ایس کا ہے۔‘‘ اسمرتی ایرانی کے بیان پر کانگریس ترجمان نے مزید کہا کہ ان کا یہی مشغلہ ہے ’جھوٹ بولو، بار بار بولو اور پروپیگنڈہ پھیلاؤ۔‘‘ سپریہ شرینیت نے کہا کہ جھوٹ پھیلانے کی جو تربیت اسمرتی ایرانی کی ہوئی ہے اس کا پردہ فاش کرنا ضروری ہے۔
انہوں نے کہا ’’بی جے پی کے تمام لیڈران لگاتار جھوٹ بول کر اصل مسائلہ سے توجہ ہٹاتے ہیں۔ حقیقت یہ ہے کہ اڈانی اور مودی کے تعلقات کی پرتیں کھل رہی ہیں اور عوام سب دیکھ اور سمجھ رہے ہیں۔ جو رنگی، پُتی اور کھوکھلی شبیہ بنائی گئی تھی اس کا سچ سب کے سامنے آ رہا ہے۔ اڈانی پر جو سوال راہل گاندھی نے پارلیمنٹ میں پوچھے تھے ان کا جواب بی جے پی اور نریندر مودی کے پاس نہیں ہے۔‘‘
سپریہ شرینیت نے کہا ’’تمام حکومت اڈانی کے بچاؤ میں اتری ہوئی ہے۔ ملک کی پارلیمنٹ اور جمہوریت کو رہن رکھ دیا ہے، تاکہ اڈانی کا دفاع کیا جا سکے۔ اگر آپ کو لگتا ہے کہ راہل گاندھی کی لوک سبھا رکنیت منسوخ کر کے ان کی آواز کو دبایا جا سکتا ہے، انہیں خاموش کیا جا سکتا ہے تو مغالطہ میں ہیں۔‘‘
راہل گاندھی کا بنگلہ خالی کئے جانے پر اسمرتی ایرانی کے تبصروں کا جواب دیتے ہوئے سپریہ شرینیت نے کہا ’’راہل گاندھی تو کہتے ہیں کہ ان کا کوئی گھر تھا ہی نہیں تو ان کا گھر چھین کر کس طرح خاموش کیا جا سکتا ہے۔ جو شخص ہر قیمت پر لڑنے کے لئے تیار ہے وہ آپ کو خوف زدہ کرتا ہے۔ اڈانی معاملہ پر خاموشی کو عوام دیکھ اور سمجھ رہی ہے۔‘‘
اسمرتی ایرانی کو آڑے ہاتھ لیتے ہوئے سپریہ شرینیت نے پوچھا کہ ’’آپ وکٹم (متاثرہ) کارڈ کیوں کھیلتی ہیں۔ آپ ایک بااختیار خاتون ہیں اور ایک وزیر بھی ہیں، پھر آپ متاثرہ کس طرح ہو سکتی ہیں۔ متاثرہ تو وہ خاتون ہے جو روزمرہ کی چیزوں کے لئے زیادہ قیمت اور جی ایس ٹی ادا کر رہی ہے۔‘‘
انہوں نے اسمرتی ایرانی پر حملہ بولتے ہوئے کہا ’’آپ ملک بھر کی ظلم و ستم کی شکار خواتین کے معاملہ میں خاموش رہتی ہیں لیکن آپ کے برابر میں بیٹھا ایک وزیر ایک خاتون کو طوائف قرار دیتا ہے آپ پھر بھی خاموش رہیں گی؟ آپ اس ملک سے کب معافی مانگیں گی۔ آپ خواتین اور اطفال کی ترقی کی وزیر ہیں، آپ کی اخلاقیات آخر کہاں چلی گئیں؟‘‘
سپریہ شرینیت نے کہا راہل گاندھی کو کسی بھی طرح کے حربہ کے ذریعے خاموش نہیں کیا جا سکتا ہے۔ آج آپ سے پورا ملک پوچھ رہا ہے کہ اڈانی اور آپ کے کیا تعلقات ہیں۔ اقتدار کی ضرورت آپ کو ہے تاکہ آپ تمام طرح کے کرتوتوں کو انجام دے سکیں۔ راہل گاندھی کے پاس سچائی کی طاقت ہے اور وہ اسی کے ساتھ لڑائی لڑ رہے ہیں۔
