قطر میں عمارت گرنے سے 5 پاکستانی جاں بحق

دوحہ ۔ 27؍ مارچ/ قطر کے دارالحکومت دوحہ میں عمارت گرنے سے 5 پاکستانی مزدور جاں بحق ہوگئے، پانچوں نوجوانوں کی میتیں پاکستان بجھوانے کے انتظامات کئے جارہے ہیں۔تفصیلات کے مطابق قطر کے دارالحکومت دوحہ میں عمارت گرنے سے 5 پاکستانی تارکین وطن جاں بحق ہوگئے، جاں بحق ہونے والوں میں ذیشان عزیز عرف شانی،مظہرجمال اورعظیم ساکن ڈھاب جبکہ احسن ریاض کا تعلق تھنیل کمال اورعدیل کا تعلق قصبہ اٹھوال سے ہے۔ابتدائی اطلاعات میں بتایا گیا کہ جاں بحق ہونے والے پانچوں نوجوانوں کی میتیں عمارت کے ملبہ سے نکالنے کے بعد دوحہ ہسپتال کے سرد خانہ میں منتقل کر کے پاکستان بجھوانے کے انتظامات کئے جارہے ہیں۔حادثہ کی اطلاع ملتے ہی نوجوانوں کے گھروں میں کہرام مچ گیا، ورثاء نے حکومت سے مطالبہ کیا ہے کہ ان کے پیاروں کی میتیں جلد از جلد آبائی وطن روانہ کی جائیں۔اطلاعات کے مطابق گزشتہ بدھ کو دوحہ میں ایک سات منزلہ عمارت گرنے کے بعد متعدد ہلاکتیں ہوئیں، گرنے والی عمارت میں کئی پاکستانی، مصری اور فلپائنی خاندان مقیم تھے۔