جموں کشمیر میں اپنی رویت ہلال کمیٹی کا قیام جلد ۔ڈاکٹردرخشاں اندرابی

بدھ کورات دیر گئے چاند نظرآنے یانہ آنے کے معاملے پر پیداشدہ کنفیوزن کے بعد جموں وکشمیروقف بورڈکی خاتون چیئرپرسن ڈاکٹر درخشاں اندرابی نے جمعرات کویہ اعلان کیاکہ جموں وکشمیرمیں ہلال کمیٹی تشکیل دینے پر غور کیاجائے گا۔ وقف بورڈکی سربراہ درخشاں اندرابی نے درگاہ حضرت بل میں ماہ مبارک کے پیش نظرکئے جارہے انتظامات کاجائزہ لینے کے دوران نامہ نگاروں سے بات کرتے ہوئے کہاکہ پہلے جموں وکشمیرمیں مفتی اعظم کی جانب سے ماہ رمضان شروع ہونے یا عیدمنانے کے حوالے سے اعلان کیا جاتا تھا ،اوراسی اعلان کے مطابق یہاں لوگ روزہ رکھتے تھے اورعید بھی مناتے تھے ۔انہوںنے کہاکہ یہاں مفتی اعظم کے کہنے پر روزے رکھے جاتے تھے ،اورعید بھی منائی جاتی تھی ،لیکن بدھ کی شام کنفیوزن پیدا ہوا۔درخشاں اندرابی کاکہناتھا کہ اب ہمیں سوچنا پڑے گاکہ ہمارے پاس اپنی ہلال کمیٹی ہو،جدیددُوربین ہو،تاکہ یہاں لوگ خود ہی یہ طے کرسکیں کہ ہمیں کب سے روزے رکھنے ہیں ،اور عید کب منانی ہے ۔انہوںنے کہاکہ بہت سے لوگوںنے اس معاملے پر مجھ سے بات کی ،اورلوگوںکی مانگ ہے کہ ہماری اپنی رویت ہلال کمیٹی ہونی چاہئے،اورہمارے یہاں بھی ایک ایسا کنٹرول روم ہونا چاہئے ،جہاں چاند دیکھنے کی سہولیات میسر ہوں۔وقف بورڈکی خاتون چیئرپرسن نے کہاکہ ہم اس بارے میں سبھی لوگوں کیساتھ بات کریں گے،اوراُن سے تجاویز لیں گے ۔ڈاکٹر درخشاں اندرابی نے کہاکہ آج سائنٹیفک دور ہے اور ہم اگلی عید تک اسبارے میں کوئی حتمی فیصلہ لیں گے ۔ایک سوال کے جواب میں درخشاں اندرابی کاکہناتھاکہ اسبار درگاہ حضرت بل میں خاصے انتظامات کئے گئے ہیں تاکہ یہاں نماز اداکرنے کیلئے آنے لوگوںکوکسی طرح کی مشکل پیش نہ آئے ۔انہوںنے کہاکہ ہم نے یہاں خیمے لگوائے ہیں تاکہ موسم خراب ہونے کی صورت میں نمازیوںکوکسی قسم کی تکلیف نہ پہنچے ۔ڈاکٹر درخشاں اندرابی نے کہاکہ امسال درگاہ حضرت بل سے نماز تراویح کوبراہ راست دکھایا جائے گا۔ایک اورسوال کے جواب میں موصوفہ کاکہناتھاکہ وقف بوڈ کی جانب سے بیت المال قائم کیاگیاہے تاکہ زکواة اورصدمات کو اس میں جمع کیاجائے ۔انہوںنے کہاکہ ہمارے یہاں بہت سے لوگ اور کنبے غریب ہیں ،جو کسی کے سامنے ہاتھ نہیں پھیلاتے ہیں ،اور ہم ان کوگھروںمیں جاکر ہی مالی معاونت کریں گے ۔درخشاں اندرابی نے کہاکہ بیت المال میں جمع ہونے والی رقم غریبوں اور ضرورت مندوںمیں ہی تقسیم کی جائے گی ۔