ہندوستان، جاپان ، آسٹریلیا ایک آزاد ، کھلے ، جامع انڈو پیسیفک خطے کیلئے پرعزم

واشنگٹن(یو این آئی) وزیر اعظم نریندر مودی نے چار رکنی اتحاد کے دو اہم اراکین آسٹریلیا اور جاپان کے وزرائے اعظم سے یہاں امریکی صدر جوزف آر بائیڈن کی میزبانی میں کواڈرینگولر فریم ورک (کواڈ) کے پہلے سربراہی اجلاس سے قبل ملاقات کی۔ جو بائیڈن نے جمعہ کو ایک آزاد ، کھلے ، خوشحال اور ہند۔ بحرالکاہل خطے کے ہدف کے حصول کے لیے تعاون بڑھانے کے عزم کااظہار کیا۔ مسٹر مودی نے اپنے امریکی دورے کے دوسرے دن پانچ اعلیٰ کاروباری نمائندوں سے ملاقات کے بعد آسٹریلیا کے وزیر اعظم اسکاٹ موریسن کے ساتھ اپنی پہلی سفارتی ملاقات کی۔ وزیر اعظم کے دفتر نے تقریبا آدھے گھنٹے کی میٹنگ کے بعد ٹویٹ کیا کہ مسٹر مودی نے مسٹر موریسن کے ساتھ مختلف موضوعات پر بات چیت کی جس کا مقصد ہندوستان اور آسٹریلیا کے درمیان اقتصادی اورعوام سے عوام کے درمیان تعلقات کو گہرا اور مضبوط کرنا ہے ۔ وزارت خارجہ کے ترجمان ارندم باگچی نے بتایا کہ دونوں رہنما¶ں نے حالیہ علاقائی اور عالمی پیش رفت کے علاوہ کووڈ۔ 19 وبائی مسئلہ ، تجارت ، دفاع ، صاف توانائی اور دیگر امور پر دوطرفہ تعاون بڑھانے کے طریقوں پر تبادلہ خیال کیا۔ بعد ازاں وزارت خارجہ نے ایک بیان میں کہا کہ دونوں رہنما¶ں نے دو طرفہ جامع اقتصادی تعاون معاہدے (سی آئی سی اے ) پر جاری مذاکرات پر اطمینان کا اظہار کیا اور اسے دسمبر 2021 تک مکمل کرنے کے اپنے ارادے کا اعادہ کیا۔ دونوں وزرائے اعظم نے آزاد ، کھلے ، جامع ، خوشحال اور قواعد پر مبنی انڈین پیسفک کے ہدف کو حاصل کرنے کے لیے قریبی تعاون جاری رکھنے کے بھی عزم کا اظہار کیا۔