ٹنگڈار سیکٹر میں دراندازی کی کوشش ناکام ، ایک ملی ٹینٹ ہلاک

بارہ مولہ کے تاری پورہ میں ملی ٹینٹوں کی فائرنگ میں ایک فوجی زخمی
سرحدی ضلع کپواڑہ کے سیدہ پورہ ٹنگڈار سیکٹر میں سیکورٹی فورسز نے دراندازی کی ایک کوشش کو ناکام بنانے کے دوران پاکستانی ملی ٹینٹ کو جاں بحق کرنے کا دعویٰ کیا۔ ادھر بارہ مولہ کے تاری پورہ علاقے میں سیکورٹی فورسز اور ملی ٹینٹوں کے مابین جاری تصادم میں ایک فوجی زخمی ہوا ہے۔ اطلاعات کے مطابق فوج نے بدھ کے روز کپواڑہ کے سیدہ پورہ ٹنگڈار سیکٹر میں دراندازی کی کوشش کو ناکام بنانے کا دعویٰ کیا۔ دفاعی ذرائع نے بتایا کہ منگل اور بدھ کی درمیانی شب سیکورٹی فورسز نے ملی ٹینٹوں کے ایک گروپ کو اس طرف آتے ہوئے جنہیں للکارا گیا جس دوران شدید گولیوں کا تبادلہ شروع ہوا ۔ انہوں نے بتایا کہ ابتدائی فائرنگ میں ایک پاکستانی جنگجو مارا گیا جس کی شناخت اور تنظیمی وابستگی کے بارے میں جانچ پڑتال شروع کی گئی ہے۔ انہوں نے کہاکہ علاقے میں تلاشی آپریشن جاری ہے کیونکہ مزید ملی ٹینٹوں کی موجودگی کو خارج از امکان قرار نہیں دیاجاسکتا۔ دفاعی ذرائع کے مطابق پاکستان کی جانب سے زیادہ سے زیادہ ملی ٹینٹوں کو اس طرف دھکیلنے کی کوششیں ہو رہی ہیں تاہم حد متارکہ پر تعینات کسی بھی چیلنج کا مقابلہ کرنے کے لئے تیار ہیں۔ دریں اثنا بارہ مولہ کے تاری پورہ میں سیکورٹی فورسز اور ملی ٹینٹوں کے مابین ہوئے ایک تصادم میں فوج کا ایک اہلکار زخمی ہوا۔ پولیس ترجمان نے بتایا کہ ملی ٹینٹوں کی موجودگی کی اطلاع موصول ہونے کے بعد سیکورٹی فورسز نے جوں ہی بارہ مولہ کے تاری پورہ گاوں کو محاصرے میں لے کر تلاشی آپریشن شروع کیا تو اسی اثنا میں وہاں پر موجود ملی ٹینٹوں نے فورسز پر اندھا دھند فائرنگ شروع کی۔ اُن کے مطابق سلامتی عملے نے بھی پوزیشن سنبھال کر جوابی کارروائی کا آغاز کیا جس دوران شدید گولیوں کا تبادلہ شروع ہوا ۔ انہوں نے بتایا کہ ملی ٹینٹوں کی ابتدائی فائرنگ میں ایک فوجی زخمی ہوا جس کو علاج ومعالجہ کی خاطر نزدیکی ہسپتال منتقل کیا گیا۔ پولیس ترجمان کے مطابق علاقے میں تلاشی آپریشن ہنوز جاری ہے۔