نفرتیں پھیلانے کا رجحان ملک کی سالمیت اور سیکولر کردار کیلئے خطرہ

ملک اس وقت مشکل دور سے گزر رہا ہے /فاروق عبداللہ
نیشنل کانفرنس کے صدر ڈاکٹر فاروق عبداللہ نے کہا ہے کہ ملک ایک مشکل وقت سے گزر رہا ہے جہاں تفرقہ انگیز طاقتیں بہت زیادہ سرگرم ہیں جو ملک کے اتحاد و سالمیت کے لئے سنگین خطرہ ہیں۔ایک طبقے کو دوسرے کے خلاف کھڑا کرنے اور مذہبی منافرت پھیلانے کے اس رجحان کا سب کو متحد ہوکر مقابلہ کرنا ہوگا۔ان باتوںکا اظہار انہوںنے سینئر کانگریس لیڈر اورسابق مرکزی وزیر محسنہ قدوائی کی سوانح حیات ”ہندوستانی سیاست میں میری زندگی“ کی رسم اجرائی کی منعقدہ تقریب سے خطاب کرتے ہوئے کیا۔ ڈاکٹر فاروق عبداللہ نے کانگریس کے سینئر رہنماو¿ں اور دیگر اہم شخصیات کی موجودگی میں زور دیاکہ موجودہ حالات میں کانگریس کو تاریخی کردار ادا کرنا ہے۔ کانگریسیوں کو اپنی صفوں کو مضبوط کرنے اور متحد ہونے پر زور دیتے ہوئے صدرِ نیشنل کانفرنس نے کہا کہ ملک کو تقسیم کرنے والی طاقتوں سے نجات دلانے کیلئے کوئی بھی پہل کانگریس کے بغیر کامیاب نہیں ہوگی۔ انہوں نے کہاکہ جس طرح سے لوگوں میںنفرتیں پھیلائی جارہی ہیں وہ ملک سالمیت، آزادی اور سیکولر کردار کیلئے باعث خطرہ ہے اور ایسے میں تمام صحیح سوچ رکھنے والے شہری کو اپنا کردار کرنا ہے ۔ اس موقع پر سرکردہ رہنماو¿ں شیوراج پاٹل ،سشیل کمار شندے، منی شنکر ایر، سابق چیف الیکشن کمشنر ایس وائی قریشی اور کانگریس کے رکن پارلیمنٹ ششی تھرور شامل تھے ۔اس سے قبل صدرِ نیشنل کانفرنس ڈاکٹر فاروق عبداللہ نے نومنتخب کانگریس صدر ملکاارجن کھرگے کے گھرجاکر اُن سے ملاقات کی اور انہیں مبارکباد پیش کی۔ انہوںنے اُمید ظاہر کی کہ کھرگے صاحب اپنے تجربے اور صلاحیتوں کا بھر پور استعمال کرکے پارٹی کی مضبوطی کیلئے کام کریں گے۔